La Voz de Galicia (Santiago) - El Comarcal Santiago
ALBERTO ROMAR
«A estrada de Santa Comba a Santiago, unha débeda histórica»
Alberto Romar chegou este verán á presidencia da Asociación de Empresarios de Santa Comba, entidade cun cuarto de século de vida. Fíxoo canda nove compañeiros seus que representan a todos os sectores: comercio, industria, hostalaría ou gandaría. Entre os seus retos inmediatos destaca ampliar o parque empresarial, e non esquecen a débeda «histórica» da mellora da estrada de Santiago.
—Como está o polígono?
—Pois hai 15 empresas en activo. Moita xente cando vai alí pensa que está baleiro, pero só hai entre dúas e tres parcelas con dereito a compra. O resto están en proxectos de crear naves, por iso temos reunións semanais co Concello para ampliar a superficie.
A mediados de setembro houbo unha reunión co Instituto Galego da Vivenda e Solo (IGVS), e a raíz da mesma estase ideando un plan sectorial para unha posible ampliación en 201.000 metros cadrados, dos que útiles serían 130.000 metros.
«Dende que entramos houbo 31 altas e dúas baixas, e temos 172 asociados» «Cinco empresas interesáronse en tres meses por adquirir parcelas»
—E hai demanda?
—Levando tres meses na asociación, viñeron cinco empresas interesadas por parcelas no polígono. Sendo realistas, agora mesmo o prezo é moi elevado, cando nós cremos que coa ampliación o prezo non debería superar os 50 ou 60 euros metro cadrado. Actualmente estase vendendo a noventa, o que fai inviable instalarse.
—E a estrada de Santiago?
—A prioridade é agora ampliar o polígono, pero a mellora das comunicacións é unha demanda histórica. Facer dous quilómetros para un concello como Santa Comba non é de recibo. Cremos que aínda nos tempos que estamos agora, desde a Xunta teñen que darlle prioridade porque é una débeda histórica que teñen con Santa Comba desde hai un cuarto de século. Pensamos que a Xunta debe centrarse na segunda fase, pero agardemos que non sexa de outros dous quilómetros, porque sería un pouco insultante.
—Como foi a acollida dos socios?
—Tivemos unha moi boa acollida, porque desde que entramos déronse 31 altas, e dúas baixas, estas últimas de empresas que non son de Santa Comba. Actualmente somos 172 socios e a partir de xaneiro faremos unha nova captación co obxectivo de que no mes de abril cheguemos aos douscentos asociados, sendo o máximo histórico nos vintecinco anos da asociación.
—Que cambios inmediatos pensan facer?
—A inicios do próximo ano pensamos pasar todo o tema laboral, de facturación e de subvencións para que o leve una xestoría. Sacarémolo a concurso por dous anos entre as seis xestorías asociadas.
—E haberá eventos?
—Temos en marcha unha campaña de promoción do alto nivel do comercio e maila industria, mediante «spots» en televisión en novembro, en colaboración co Concello. Ademais, faremos a duodécima ruta das tapas, en dúas fins de semana: do 20 ao 22 e do 27 ao 29 de novembro, con 15 locais, o máximo dos últimos anos, onde cada participante que cubra todo o pasaporte terá un agasallo. E faremos tamén o Black Friday con descontos de ata o 70 % en preto de 50 comercios. Toda a información estará na web: www.comerciodesantacomba.com.