La Voz de Galicia (Santiago) - El Comarcal Santiago
A festa de todas as festas é a do Queixo de Arzúa
A cita gastronómico-musical obtivo un premio no Iberian Festival Awards
Foi chegar e bicar o santo. A Festa do Queixo que se celebra en Arzúa a primeira fin de semana de marzo concorreu por vez primeira aos Iberian Festival Awards e resultou galardoada co premio á mellor festa do territorio nacional. Na mesma categoría da quinta edición deses galardóns hispano-lusos, fallados este outubro en Lisboa, a cita gastronómico-musical impúxose por riba doutras dezaseis convocatorias festivas seleccionadas como finalistas, entre as que se atopan propostas das dimensións de «La Tomatina», o Carnaval de Santa
Cruz de Tenerife, ou a Semana Grande de San Sebastián.
Alberto Alfonso, director de Art Music Agency, foi quen presentou a candidatura arzuá, representada polo festival de música que lle dá identidade, dende as súas orixes hai corenta e cinco anos, á Festa do Queixo, distinguíndoa así no calendario gastronómico. Alfonso cualificou de «moi significativo» o premio, xa que supón «o recoñecemento ao traballo que hai detrás dun evento destas características, no marco duns premios tan relevantes da Península Ibérica, nos que compiten festas que son un referente en España e Portugal». Pon de exemplo o produtor do Festival do Queixo as Festas de São João do Porto, gañadoras absolutas na categoría á que se presentou a cita de Arzúa. Para Alberto Alfonso, o premio supón «un impulso, máis necesario ca nunca pola pandemia, que nos dá máis forza, enerxía e responsabilidade de cara a que cada edición supere a anterior». Pola súa banda, o alcalde arzuán, José Luis García
López, valorou o galardón como «un extraordinario recoñecemento a un traballo e dedicación impecable de todo un equipo. E por riba de todo, é un recoñecemento do interese e cariño da xente de Arzúa cara a súa prezada festa».