La Voz de Galicia (Santiago) - El Comarcal Santiago
A Escola de Música de Rois bate récord de matrículas
Este curso son 80 alumnos que, na súa maioría, recibirán clases individuais
A Escola Municipal de Música de Rois iniciou o curso cun récord de alumnos matriculados: 80. É a cifra máis elevada dende que o Concello puxo en marcha este servizo e tendo en conta, ademais, o actual momento de pandemia. Deste xeito, todas as clases son individuais, agás as de Linguaxe Musical, Conxunto Instrumental, Música en movemento e Coro, que terán un máximo de 5 persoas por grupo, segundo lles explicou o director ás familias nunha reunión previa ao comezo do curso a finais do mes de setembro.
Dende o Concello de Rois aseguran que están a facer unha aposta forte por manter as actividades deportivas e culturais neste curso e exemplo diso é a Escola de Música. Neste centro, tómaselle a temperatura a cada alumno antes de entrar; hai hidroxel e faise a desinfección dos instrumentos entre clase e clase para evitar a propagación da covid-19.
Como novidade, a Escola de Música de Rois ofrece ao seu alumnado maior de 12 anos a posibilidades de estudar Harmonía e Creación Musical, que se suma á aprendizaxe dos numerosos instrumentos que se poden elixir no centro: batería, baixo eléctrico, frauta, óboe, saxofón, tuba, violín ou acordeón son algúns deles.
A escola ten, ademais, «prezos accesibles», de 20 euros pola matrícula anual e, por exemplo, 35 euros ao mes polas clases de instrumento e linguaxe musical.
A escola de música incrementou de xeito considerable a súa matrícula dende que no ano 2018 o Concello promovera o primeiro intercambio musical con Venecia, de modo que alumnado do centro e do Obradoiro de Cultura Tradicional Chorima viaxaron ata Venecia para intercambiaren experiencias co alumnado da Escola Comprensiva Franca Ongaro e o Liceo Musical de Venecia.