La Voz de Galicia (Santiago) - El Comarcal Santiago
Rois é pioneiro nas aulas de apoio educativo
Ofértaas dende o ano 2017 como un espazo para aprender os escolares e tamén para seren escoitados
O Concello de Rois foi pioneiro no ano 2017 na posta en marcha das aulas de apoio educativo, un servizo de reforzo escolar a menores con dificultades no proceso de aprendizaxe. O programa está financiado polo Concello e polo Fondo Social Europeo, a través da Xunta. A responsable do mesmo é a educadora familiar Uxía Pérez e as clases son impartidas pola psicóloga Ana Rodríguez Chouza. Dende o seu comezo, xa beneficiaron a escolares de 21 familias.
Segundo explica a educadora familiar, o Concello decidiu ofertar este servizo debido a que no municipio existe un colectivo de menores con fracaso escolar, moitos dos que proveñen de familias en risco de exclusión social. Deste xeito, dende os Servizos Sociais, xunto cos departamentos de Orientación dos dous colexios do municipio, «detectaron a necesidade de programar accións de reforzo escolar para este perfil de alumnado», sinala Uxía Pérez.
Así, os obxectivos fundamentais son lograr reducir o fracaso escolar; introducir hábitos de estudo; mellorar a autoestima; fomentar a autonomía e as habilidades sociais, ademais de involucrar ás familias nos procesos de ensino e aprendizaxe dos seus fillos.
Educadora familiar e psicóloga explican que a aula constitúe «un espazo non só de reforzo estritamente académico, senón tamén de escoita activa a un colectivo vulnerable por parte dunha profesional da psicoloxía». Así, coinciden en que a actividade «é unha oportunidade para que o alumnado atope apoios na superación das etapas escolares e, do mesmo xeito, se escoite de maneira activa as súas inquietudes, medos e ilusións para a construción positiva das persoas».
Hai, ademais, un traballo previo con reunións coa responsable do departamento de Orientación escolar para establecer liñas de traballo consensuadas entre os titores e a técnico de apoio.