La Voz de Galicia (Santiago) - El Comarcal Santiago
A asociación Andaina Pro Saúde Mental cumpriu dez anos
No centro de atención integral de Dodro ten un grupo estable de 18 usuarios
Dez anos acaba de cumprir a asociación sen ánimo de lucro Andaina Pro Saúde Mental, con centros de atención integral nos concellos de Dodro e Ordes. A súa razón de ser foi cubrir o baleiro que hai unha década existía na atención global ás persoas con problemas de saúde mental das zonas rurais próximas a Santiago, segundo explica Nazaré da Vila, coordinadora e cofundadora de Andaina.
Deste xeito, o propósito da entidade é prestar apoio ás persoas con problemas de saúde mental, aos seus familiares e achegados, fomentando a súa autonomía e dando sentido ao seu desenvolvemento cotiá. En Dodro, a entidade ocupa parte das instalacións de A Paxareira, cedidas de forma desinteresada pola Comunidade de Montes Balouta e Fontecoba, á que a asociación lle traslada o seu agradecemento e lle atribúe unha «sensibilidade especial co tecido social», explica a coordinadora, que asegura que o lugar «é marabilloso; ideal para unha asociación das características de Andaina».
Na actualidade, en Dodro hai 18 usuarios de toda a comarca e concellos limítrofes como Rianxo, Valga ou Pontecesures, con idades comprendidas entre os 35 e 65 anos. A atención integral pasa por desenvolver varios programas básicos, entre os que Nazaré da Vila destaca os Centros de Rehabilitación Psicosocial e Laboral; igualdade; intervención familiar; atención domiciliaria; ocio e tempo libre; socio-educativo e talleres pre-laborais. Todo iso permítelle ofrecer atención psicolóxica; social; familiar; preventiva; rehabilitadora e de inserción laboral e na comunidade. Ademais,
dende decembro do ano pasado Andaina ten prazas concertadas coa área de Saúde Mental do Sergas o que, para os responsables da entidade, supón un recoñecemento ao seu bo facer. Os usuarios en cada lugar conforman un grupo estable e, normalmente, acceden a Andaina a través da atención domiciliaria. A asociación tamén destaca polo seu Centro Especial de Emprego, autorizado dende o ano 2017 para a elaboración de bebidas fermentadas e zumes, que se poden adquirir a través da páxina web da entidade. Na actualidade, no centro traballan catro usuarios, asesorados por un técnico de emprego e a coordinadora fala de que «o cambio é radical cando un usuario pasa polo centro especial de emprego». Para a atención integral, Andaina Pro Saúde Mental conta cun grupo de profesionais con experiencia no eido da saúde mental.
De forma recente, a asociación renovou a xunta directiva dando paso a unha nova xeración, segundo explica Nazaré da Vila, que tamén ten palabras para o entorno no que se sitúa o centro de Dodro e fala de que «é un luxo», así coma o trato dos veciños.