A atención aos vulnerables e as medidas de apoio ás familias e sectores máis afectados, prioridades do Concello de Oroso neste ano de pandemia

Desde o comezo da crise sanitaria, o concello leva investidos preto de 125.000 euros en material de protección e limpeza para o comercio e a cidadanía en xeral.

A crise sanitaria e económica da Covid-19 irrumpiu no ano 2020 e obrigou a un cambio de prioridades en todas as administracións. O Concello de Oroso tivo moi claro desde un primeiro momento os colectivos que necesitaban unha maior atención durante a pandemia, adoptando durante as semanas e meses posteriores á declaración do Estado de Alarma un paquete de medidas de apoio ás familias, pemes e autónomos. “Ninguén contaba con isto, os últimos meses parecen o guión dunha película de ciencia ficción, pero os responsables públicos temos que adaptarnos ás circunstancias, trasladar tranquilidade e tomar decisións en beneficio da veciñanza”, asegura o alcalde, Manuel Mirás Franqueira. O Concello de Oroso habilitou desde o comezo da pandemia un servizo para as persoas maiores, aquelas que viven soas ou se atopan en situación de vulnerabilidade e non contan con apoio familiar ou social. Entregouse a diario comida ou medicamentos grazas ao traballo de Protección Civil ás persoas que o demandaron, ademais de atender outras necesidades. Toda a poboación recibiu mascarillas. Comezou o reparto entre os colectivos de risco e as persoas maiores, ademais dos establecementos comerciais abertos e dos traballadores que tiñan que incorporarse aos seus postos de traballo, pero nunha fase posterior o reparto chegou ao conxunto da cidadanía.

No mes de maio, o Concello de Oroso repartiu entre os establecementos comerciais que abrían as súas portas dispensadores de hidroxel e material de protección (EPI), como máscaras, luvas, batas e pantallas.