Unha gran hidrografía como fío condutor para o percorrido

Cinco muíños restaurados, un merendeiro e unha espectacular fervenza que forma o río Mira, en Castriz, conforman un dos principais atractivos naturais de Santa Comba ou, polo menos, un dos máis visitados. Accédese pola estrada de Coristanco e ao entrar en Castriz convén estar atentos ao xiro á dereita, ben indicado nun sinal, para chegar ao camiño de terra polo que se accede ao conxunto natural do río Mira, recomendándose aparcar o coche e ir a pé.

Os lugares pintorescos abundan ao longo do curso do río Xallas. Son moi recomendables as súas praias fluviais, a de San Salvador e Esmorode, dotadas de merendeiros, fontes e zonas de sombra, ideais para o baño seguro e unha comida en familia. Tanto o Xallas como os seus afluentes García, Mira ou Abuín, conservan espazos naturais que son descoñecidos, aínda que roteiros como a da presa da Xesteira ben vale coñecela con calma. É un lugar cheo de historia pois albergou a primeira fábrica de electricidade da zona. É un paseo para os sentidos.

A parte de ríos, muíños, pazos, cruceiros ou igrexas, moi abundantes en todo o territorio xalleiro, as vistas panorámicas son espectaculares en cumios como os do miradoiro de San Bartolomeu, accedendo polo lugar de O Busto, en Santa Sabiña; ou o monte de Varilongo, aínda que aquí convén facelo con persoas da zona debido ao perigo dos pozos das antigas minas de wólfram.