La Voz de Galicia (Santiago) - El Comarcal Santiago
Manteis turísticos e sostibles para dar a coñecer Padrón
A iniciativa do Concello pódese atopar en preto de trinta locais de hostalaría
[UXÍA LÓPEZ] Arredor de trinta locais da hostalaría padronesa uníronse á campaña do Concello Vive Padrón, unha iniciativa que pretende impulsar o turismo e o comercio local, ao mesmo tempo que se erixe coma unha proposta sostible. Deste xeito, os establecementos recibirán esta semana manteis individuais en formato A3 cun orixinal deseño dun plano da localidade no que se resaltan os principais atractivos turísticos do municipio.
O Santiaguiño do Monte, o convento do Carme, O Pedrón, o Paseo do Espolón, o Xardín Botánico,
o cruceiro de Fondo da Vila, a igrexa de Santa María A Maior de Iria Flavia ou o convento de San Antonio de Herbón son algúns dos puntos destacados do turismo padronés que se destacan no mapa.
Unha das particularidades destes manteis é que foron creados a partir de residuos de caña de azucre, con fibras naturais e homologados para estar en contacto con produtos alimentarios. Tamén son biodegradables e para a súa impresión empregouse tinta sen produtos químicos. A concelleira de Turismo de Padrón, Lorena
Couso, explica que «dende o noso departamento promovemos diferentes accións para consolidar Padrón coma un destino turístico sostible, respectuoso co medio ambiente e comprometido cos dezasete Obxectivos de Desenvolvemento
Sostible da Axenda 2030 establecidos pola ONU».
A campaña Vive Padrón tamén se desenvolverá nas redes sociais a partir do 1 de xullo, concretamente a través de Instagram cun concurso mediante o que as persoas participantes teñen a opción de gañar vales para canxear posteriormente nos locais, restaurantes, comercios ou empresas de turismo activo de Padrón. Tamén está en marcha a campaña Padrón experiencias.