La Voz de Galicia (Santiago) - El Comarcal Santiago
O colexio de Dices, en Rois, estreará cuberta e ventás
[UXÍA LÓPEZ] Era o ano 1981 cando Rois estreaba o primeiro edificio de Educación Primaria de Os Dices, ao que uns anos despois se sumaría o que hoxe se coñece como administrativo e máis tarde o de Secundaria. Nos dous primeiros deles, a Xunta renovará este verán a carpintería de aluminio e a cuberta, que tamén cambiará no de Secundaria.
Para todo iso, o Goberno galego fará un investimento de máis de 464.000 euros e a actuación iniciarase este verán para que estea rematada en dous meses. Deste xeito, está previsto a substitución do acabado de cubertas existente, de placas de fibrocemento, por paneis de aceiro con illante intermedio, así como a renovación dos calóns e baixantes. O proxecto inclúe tamén a substitución das carpinterías exteriores e persianas. Colocarase unha nova carpintería de aluminio anodizado con apertura oscilo batente e con dobre acristalamento.
A obra foi anunciada polo delegado da Xunta, Gonzalo Trenor, quen asegura que esta importante actuación ten por obxectivo primordial mellorar o confort dos alumnos e profesores que cada día interactúan no centro e vai na liña das pautas marcadas no Plan da Nova Arquitectura Pedagóxica de Galicia do Goberno galego, que está en fase de diálogo con diversos colectivos para o seu enriquecemento. Trenor lembrou que a Xunta ten «a obriga e a responsabilidade de coidar a máximo os centros educativos, xa que é o lugar onde os nosos fillos pasan a meirande parte do seu tempo, e non só para a adquisición de coñecementos, senón onde interactúan cos seus compañeiros, onde xogan e onde aprenden a socializar».
Pola súa banda, o alcalde de Rois agradécelle á Xunta este forte investimento no CPI dos Dices, que vai «redundar nunha mellora da calidade educativa no concello de Rois», sinalou. O rexedor indica, que para o vindeiro curso, alumnado e profesorado de Rois poderán «volver estrear un novo centro, con importantes melloras, aínda que o edificio teña xa corenta anos». A obra no colexio súmase a que un ano antes se fixo no pavillón municipal, situado de lado, e onde tamén se renovou a cuberta, cun investimento que rondou os 100.000 euros.