La Voz de Galicia (Santiago) - El Comarcal Santiago
A «fiandeira das verbas» asina o seu segundo libro
María Luisa Pereiro alza a voz polas mulleres contra o maltrato machista e para reivindicar o seu papel no rural
[NATALIA NOGUEROL] María Luisa Pereiro é máis amiga do verbo facer cá do ser. «Síntome escritora cando escribo, nai cando estou con meu neno, e amiga cando estou cunha amiga... as persoas non somos a profesión á que nos dedicamos. Non me gusta que nos cualifiquen», defende esta veciña de Melide, que fía tan ben as verbas como as puntadas das que fixo oficio cando con 15 anos empezou a traballar como modista. Pero o escribir é nela aínda máis prematuro có coser. Faino dende nena como vía de escape para xestionar emocións. «Ao principio facíao en forma de diario [...]. Máis tarde decanteime pola poesía, chamábame a atención a rima, e ese fondo tan máxico e peculiar que ten a lírica», conta a melidense na súa autobiografía en «A.M.A. En esencia», a publicación que asina xunto coas taboadesas Ana Vila Portomeñe, «a poeta labrega», e Ana Isabel Rey.
A achega de Pereiro á publicación conxunta, tamén editada polas tres autoras, está composta por poesías —e tamén algún que outro relato curto— nas que alza a voz polas mulleres contra o maltrato machista, e para reivindicar o determinante papel que desempeñan no rural. A pandemia e as inxustizas tamén inspiraron versos da escritora melidá, que amosa a alma espida nunha obra con, así mesmo, poemas intimistas que son cantos á súa avoa e á súa nai. A ela débelle á vida, e tamén o volver refuxiarse na escritura, que «me axudou, e segue axudando a pasar o duelo», confesa. Ana Vila, Ana Isabel Rey e María Luisa Pereiro botaron man das súas iniciais para o título de «tres libros nun», como di a poeta de Melide dunha publicación coa que as tres queren desfacerse do peso da «lousa enriba que é ser muller, de clase traballadora e do rural».
«A.M.A. En esencia», do que se editaron douscentos exemplares que están á venda nas librarías locais, non é o primeiro libro de poemas de María Luisa Pereiro. No 2019, a escritora melidá fixo coincidir a festividade de Santa Lucía, patroa das modistas, coa presentación de «Fiando nas letras», o seu primeiro poemario. Escrito integramente en galego, a publicación, tamén de edición propia, adapta o nome de «A fiandeira das verbas», o pseudónimo co que se presentou e resultou distinguida nun certame literario en Santiso.