La Voz de Galicia (Santiago) - El Comarcal Santiago
O Diververán de Rois esperta o interese dos nenos polo rural
[UXÍA LÓPEZ] O Concello de Rois consolida a súa programación para que os seus veciños concilien no verán a vida laboral e familiar e faino ao grande: a edición deste ano reúne a 160 nenos de entre 3 e 14 anos, algúns de tres municipios máis (Padrón, Brión e Santiago) e mesmo doutras comunidades (Madrid e Valencia), de familias que pasan as vacacións en Rois.
O protagonista deste Diververán é o porviso, un trasno mitolóxico tradicional de Rois. Este ten un papel fundamental nun dos obxectivos do programa: fomentar entre a rapazada o seu interese polo rural, por coñecer e dar a coñecer o lugar onde viven e poñer en valor os recursos naturais de Rois, segundo o Concello. Este ser, que segundo a lenda vivía no inframundo, sae agora imaxinariamente das mámoas de Ermedelo para buscar os catro elementos (lume, auga, terra, aire) e anda á procura da axuda dos nenos de Rois para conseguir o seu premio.
Con este fío condutor, a actividade busca que os nenos poidan coñecer, recoñecer e poñer en valor lugares como a praia fluvial de Seira; os pazos do Faramello e de Antequeira e as rutas das Penicias e do Castro Lupario. Os menores tamén coñecen o traballo de grandes artistas do municipio como Sonia Ares ou Camilo Seira e a labor que fan na Asociación de Nais e Pais de Persoas con Discapacidade Intelectual da Comarca do Sar (Amipa). Ademais, representantes das Asociacións de Amas de Casa de Rois e das Mulleres Rurais de Urdilde participan nun intercambio xeracional cos menores, para que poidan ter unha visión máis enriquecedora do que supón vivir nun municipio rural como Rois. As visitas á piscina descuberta de Senra e aos locais dos artesáns e as saídas para facer sendeirismo ou falar coas persoas maiores axudan aos nenos a poñer en valor o que teñen máis preto.
A demanda da actividade de conciliación neste mes e no de agosto foi moi grande e os nenos están repartidos en grupos burbulla, atendidos por 22 monitores dirixidos por Rebeca Casal. O horario é de luns a venres, de nove e media da mañá a dúas e media da tarde. Uns 26 nenos apuntáronse ao programa Amencer, que comeza ás sete e media da mañá.