La Voz de Galicia (Santiago) - El Comarcal Santiago
A cultura e a música rulan pola aldeas do municipio de Padrón
O Concello descentralizou a súa oferta con celebracións accesibles e seguras
[UXÍA LÓPEZ] A cultura e a música rulan por Padrón. O Concello de Padrón sacou partido de restricións como a limitación de aforos e optou por ofertar unha programación cultural descentralizada polas parroquias do municipio. Se no mes de xuño foron actividades familiares baixo o nome de A Cultura rula por Padrón, agora son os concertos da Banda Municipal de Música. Estes súmanse as actuacións que xa ofreceron as catro agrupacións folclóricas do municipio: Rosalía de Castro, Arreixeira, O Pedrón e San Pedro de Carcacía. A concelleira de Cultura, Lorena Couso, explica que «dende o Concello quixemos colaborar coas distintas agrupacións musicais do municipio, sobre todo despois de todo este tempo sen actuacións pola covid. Por iso promovemos a actuación dos distintos grupos folclóricos e levamos a Banda Municipal de Música a actuar polas distintas parroquias de Padrón».
Deste xeito, en agosto comezaron as actuacións e para setembro quedan dúas citas: o campo do Santuario de Herbón (día 3) e o campo da festa da Ponte (día 4). En todos os casos, a hora do concerto son as oito da tarde e, en caso de choiva, suspenderase a actuación e fixarase unha nova data. A entrada é de balde.
O Concello quere manter a programación por parroquias de cara ao vindeiro verán, ante o éxito de público que tivo, sen contar que é máis segura. A maiores, a celebración por parroquias supón ofertar unha cultura «accesible a todo o mundo», explica Lorena Couso. Tanto as actuacións dos grupos folclóricos como da banda de música supón, ademais, un impulso a súa actividade xa que, di a concelleira, «estaban totalmente parados pola pandemia e mesmo sen ensaiar». O dito, a oferta cultural polas parroquias chegou para quedar.