La Voz de Galicia (Santiago) - El Comarcal Santiago
Dodro impulsa a práctica do deporte facilitando material
Nas pistas de Bexo e Lestrove instalou caixas co equipamento para xogar
[UXÍA LÓPEZ] O Concello de Dodro puxo en marcha un proxecto piloto para as pistas deportivas, que consiste na dotación de caixas para albergar o material co que se practica deporte nas mesmas. De acordo co concelleiro responsable de área, Abel Tarrío, con esta iniciativa «preténdese impulsar o uso das instalacións deportivas ao aire libre sen que as persoas usuarias teñan que trasladar o seu propio equipamento e tamén posibilita a práctica ocasional ou non planificada».
As caixas experimentais están situadas dende o mes de maio nas pistas deportivas de Bexo e na polideportiva da Devesa, en Lestrove.
O concelleiro conta que o funcionamento das mesmas «é moi sinxelo, xa que as persoas usuarias da instalación só teñen que abrir a caixa para coller o material que vaian utilizar e, unha vez finalizada a práctica deportiva, volver deixalo dentro da caixa e pechar a porta». No interior hai dous balóns, un de fútbol sala e outro de baloncesto, que son os deportes que se poden practicar nesas pistas, aínda que na de Bexo hai rede e tamén pode ser tenis, pero polo de agora o Concello non meteu raquetas.
Dende a área de deportes agárdase que esta iniciativa «teña éxito, e as persoas usuarias das pistas deportivas respecten o material e o equipamento público». Desta forma programaranse novas instalacións de caixas noutras pistas deportivas e mesmo con outro tipo de material, sempre e cando, insisten dende o Concello, se respecte o material e este non falte, como xa ten pasado.
Nesta mesma dirección de dotar de material as instalacións deportivas de equipamento, no mes de xullo o Concello instalou unha rede de tenis na pista de Bexo, para facilitar a práctica deste deporte nos meses de verán.
Por outra banda, a área de Deportes de Dodro organiza un ano máis a Liga de Bolos, unha competición moi consolidada neste concello que comezou a finais de xuño en Bexo, continuou o pasado 22 de agosto no Campo do Bosque e este domingo é a quenda de Lestrove, antes de pechar a competición en setembro en Manselle. Participan once equipos, de Dodro pero tamén de Rianxo, Boiro e A Pobra, segundo o edil Abel Tarrío. Os torneos coinciden coas festas patronais de cada lugar.
«Agardamos que a iniciativa teña éxito e que se respecte o equipamento»