La Voz de Galicia (Santiago) - El Comarcal Santiago
A nova páxina web de Rois facilítalle as xestións aos veciños
[UXÍA LÓPEZ] O Concello de Rois estreou páxina web cunha forte aposta pola realización de trámites en liña e o contido audiovisual. O obxectivo principal é precisamente ese: potenciar os trámites en liña e facilitarlle á veciñanza a realización de xestións sen necesidade de desprazarse. Ademais de información práctica sobre o funcionamento do Concello e os servizos que ofrece, a promoción turística do municipio ten un peso importante no novo portal, no que destacan os contidos audiovisuais.
Deste xeito, os formularios de trámites en liña son unha das principais novidades da nova web www.rois.gal. A intención do equipo de goberno que dirixe Ramón Tojo «é facilitarlle á veciñanza a relación coa administración local sen ter que desprazarse, co conseguinte aforro de tempo», asegura.
No que atinxe á promoción turística do municipio, o portal institucional en Internet conta coa sección Coñece Rois, dende a que se poñen en valor, con moito contido audiovisual, o rico e variado patrimonio cultural e natural do concello, así como as súas tradicións. Dende o apartado de patrimonio natural convídase ao visitante a coñecelos e sentilos, coma unhas terras que cómpre percorrer devagar, deixándose levar polo ritmo paseniño que marcan os regatos, as fontes, os camiños, as xentes...
Imaxes aéreas, o nome das aldeas e a localización no mapa municipal de cada unha das parroquias, todas as festas e tradicións do concello, con especial dedicación ás do Santo Isidro, son outros dos apartados que se destacan para dar a coñecer Rois.
Tamén se inclúen referencias aos Camiños de Santiago, explicitamente ao Portugués e ao novo pola Ría de Muros-Noia. Os apartado onde durmir, onde comer e como chegar completan a promoción turística de Rois dende a nova páxina web, que conta así mesmo cunha sección multimedia e de publicacións.
O Concello confiou na empresa compostelá Alicentis para desenvolver a nova web, na que se poden atopar todos os servizos e instalacións municipais xeolocalizados nun mapa, ademais de todas as novas relacionadas coa actividade municipal.