La Voz de Galicia (Santiago) - El Comarcal Santiago
«Deben facilitar o uso da terra abandonada para producir»
Patricia Rodríguez cría vacas de raza rubia de calidade suprema para carne
[E. FORJÁN] Patricia Rodríguez Canedo teno claro: «Eu e máis meu home non entendiamos vivir fóra do rural. Decidimos ter fillos e asentarnos na aldea para conciliar mellor, e así foi», tal e como sinala esta gandeira de 28 anos, con dous fillos, de 4 e 2 anos, que xunto ao seu marido crían vacas de raza rubia galega para carne, dende a súa explotación na parroquia de San Salvador, no concello de Santa Comba.
Comezaron hai catro anos tras facerse cargo da pequena explotación da avoa da súa parella: «Empezamos con tres cabezas e fomos criando ata chegar ás 56 que temos na actualidade. Estamos suxeitos á Indicación Xeográfica Ternera Gallega e vimos de dar un salto á produción de carne de calidade suprema, co que abríronse novas expectativas de mercado. Estamos moi contentos do paso dado», explica Patricia, da gandería Casa de Sara —o nome da avoa do seu home—, e na que traballan os dous, se ben el é inxenieiro mecánico.
Patricia acolleuse ao programa de incorporación de xóvenes e di estar moi satisfeita de como lle van as cousas, aínda que láiase da «lentitude» burocrática da Xunta. «Sempre escoitas e ves novas de que é necesario que os novos vivamos e traballemos no rural, pero logo, a realidade é ben distinta, xa que ves que hai bastantes trabas e non hai axilidade nos trámites», afirma esta gandeira, quen pide á Xunta non só unha maior celeridade nos trámites, senón tamén que faciliten o uso da terra abandonada a aquelas explotacións que como a súa dependen das leiras para darlle de comer ás súas vacas «e en lugares como San Salvador aínda non chegou a concentración parcelaria, temos moitas leiras pequenas e a meirande parte abandonadas, polo que no mellor dos casos acábanlle plantando eucaliptos», sen que a administración actúe.
Unha das cuestións que máis lle gustan da vida no campo é dispoñer de tempo para conciliar a vida laboral e familiar: «Dos nosos fillos ocupámonos nós. Eu, antes traballaba nunha oficina como administrativa, pero agora sería imposible porque non tería tempo libre para atender ás crianzas», e subraia que non lle gustaría voltar ao traballo anterior vendo agora que no campo non está tan suxeita aos horarios ríxidos e ten máis posibilidades de conciliar.