La Voz de Galicia (Santiago) - El Comarcal Santiago
Rois ten por primeira vez técnicos de turismo e igualdade
O Concello contrata persoal para potenciar as dúas áreas
[UXÍA LÓPEZ] «Rois ten un gran potencial turístico, que queremos poñer en valor incentivando o patrimonio natural, cultural e etnográfico». Quen fala así é o primeiro técnico de turismo que ten o Concello de Rois. Alexandre Blanco Roo vai compaxinar o seu traballo entre este concello e os de Dodro e Lousame. O primeiro deles, ademais, reforzou o seu cadro de persoal coa incorporación, tamén por primeira vez, dunha técnica de igualdade, xunto cunha nova traballadora social para o departamento de Servizos Sociais.
En canto á materia de turismo, que o goberno de Rois quere potenciar, os principais obxectivos que se propón acadar o técnico son «crear rutas guiadas, potenciar as que xa están sinalizadas e fomentar e incentivar a educación ambiental» para que os veciños do municipio e doutros lugares poidan descubrir todos os atractivos que ofrece este concello, segundo di.
Rutas de sendeirismo
«A xente agora busca saír e coñecer a contorna que ten máis preto», sinala Alexandre Blanco. «En Rois temos dúas rutas de sendeirismo sinalizadas e estase a traballar noutra conxunta cos municipios de Padrón e Dodro para difundir os Fondóns que Rosalía de Castro recolleu nun dos seus libros», conta o técnico.
Por outra banda, o pasado mes de marzo, a corporación local de Rois aprobou o segundo Plan de Igualdade e, dende o verán, incorporouse ao Concello Maruxa Ledo como técnica de igualdade para reforzar o desenvolvemento deste plan e, entre outras funcións, «fomentar o empoderamento das mulleres e por en marcha accións de corresponsabilidade que sirvan para equiparar o traballo de mulleres».
A primeira técnica de igualdade de Rois tamén quere «contribuír a incorporar a perspectiva de xénero no día a día do funcionamento do concello e de toda a veciñanza», indica Maruxa Ledo. Todo isto sen esquecerse de informar e asesorar as veciñas e veciños de Rois sobre «as iniciativas que teñan as administracións públicas para acadar a igualdade de oportunidades». Ademais das incorporacións de Maruxa Ledo e
Alexandre Blanco, o Concello de Rois contratou tamén á traballadora social Alba Pais para reforzar Servizos Sociais.