La Voz de Galicia (Santiago) - El Comarcal Santiago
Comer saudable ten descontos para os escolares de Padrón
[UXÍA LÓPEZ] Os escolares de Padrón aprenden hábitos de vida saudables ao tempo que poden obter descontos para consumir en 19 establecementos do comercio local. Iso é posible grazas á campaña que o Concello ten en marcha nos colexios Rosalía de Castro e Flavia para fomentar unha alimentación e hábitos de nutrición saudables entre os nenos de primeiro a sexto curso de educación primaria.
O programa desenrolase durante todo este curso escolar e inclúe xogos, adiviñas e concursos. Así, o alumnado mellor puntuado nesas actividades recibirá unha pulseira coa que terá dereito a un desconto dun 10% das súas compras nos 19 establecementos locais que se sumaron ao proxecto e que están identificados co cartel Sana el Hoy, vive el mañana.
Segundo explica a concelleira de Cultura, Lorena Couso, «nos colexios cóntannos que están moi contentos e que a campaña está gustando moito». Tamén expresa o agradecemento do Concello «pola colaboración dos colexios, así como a participación dos comercios por sumarse unha iniciativa coa que buscamos promover unhas condutas saudables e sostibles nos nosos nenos». Deste xeito, Lorena Couso desexa que «estas pulseiras desconto sirvan non só para promover o consumo no comercio local, senón tamén para que as nosas crianzas substitúan as bebidas azucradas e as graxas saturadas, presentes tanto na pastelería industrial coma nos snacks, por alimentos sas e saudables coma froitas ou verduras».
Os comercios participantes son: A Tenda de María, Peluquería-Barbería A de Aarón, Calzados Noya, Elefantes e Castelos, Bianco Kids, Berma, Librería Sar, Vicente Domínguez Fotógrafo, Soletess Zapatería, Camden Town, Joyería Cortiñas, Sweet Sytle, O Liño, Óptica Afflelou, Almacenes Eladio, Deportes Estornela, Toysa, Jugueterías Tatino e Peluquería Karol.
Dende Soletess Zapatería, a súa titular Cristina Dorrío valora positivamente a campaña e xa atendeu a nenos que levaban a pulseira co desconto. «Vexo xenial todo o que sexa axudar ao comercio local e os nenos veñen contentísimos coa pulseira, que contan que gañaron ao acertar preguntas ou obter máis puntos», afirma.