La Voz de Galicia (Santiago) - El Comarcal Santiago
Dodro dá un gran impulso á recollida selectiva de lixo
Instala colectores para restos de obra e tamén os terá para pilas e móbiles
[UXÍA LÓPEZ] O Concello de Dodro asegura que aposta firmemente pola recollida selectiva de lixo, para o que apela á concienciación dos veciños para que ese sistema sexa cada vez máis usado e se faga con éxito, tal e como explica o concelleiro delegado de área, Ramón Abuín. Este di que «agardamos que a xente responda positivamente e faga un bo uso dos colectores». Para que sexa así, a día de hoxe o Concello ofrece a posibilidade de depositar todo tipo de residuos, dende un simple papel a restos de obra, aceites de cociña usados ou pilas.
Deste xeito, aos tradicionais colectores de orgánicos, envases, vidro papel e cartón, súmanse agora tres puntos de recollida de restos de pequenas obras e reformas, un servizo do que non dispoñen moitos concellos, a menos que teñan punto limpo. Estes colectores sitúanse en Bexo, Lestrove e xunto ao pavillón polideportivo municipal. Unha vez cheos, unha empresa xestora recolle o material, que pode ser depositado polos veciños de Dodro sen ningún tipo de custe para eles.
Ademais, a través dunha subvención nova da Xunta para a recollida de residuos de competencia municipal, o Concello vai dispor dun remolque con varios apartados nos que se poderán depositar residuos como pilas ou teléfonos móbiles. Ese remolque estará dispoñible en sete localizacións distintas do concello, en cada unha delas durante un determinado tempo, para cubrir todo o territorio e dar servizo a todos os veciños. O Concello tamén acaba de recibir novos colectores de papel e cartón, a través unha subvención do Fondo de Compensación Ambiental da Xunta. Xunto cos recursos, o goberno local tamén ten en marcha unha campaña divulgativa sobre a recollida selectiva, pola que aposta claramente en beneficio do medio ambiente e tamén das contas do Concello unha vez que, aínda que a recollida está municipalizada, o lixo é entregado en Sogama.
Dodro quere continuar así a liña dos bos datos que rexistrou o ano pasado no tocante á recollida selectiva de residuos, de modo que reduciu a cantidade de orgánicos en favor dos reciclables de envases, papel e vidro.
«Agardamos que os veciños se conciencien e respondan positivamente»