La Voz de Galicia (Santiago) - El Comarcal Santiago
A Casa de Rosalía terá en primavera un auditorio renovado
O edificio non reunía as condicións necesarias para a vida da fundación
[UXÍA LÓPEZ] Mentres as visitas virtuais da Casa de Rosalía van lanzadas, a fundación de Padrón que leva o nome da escritora continúa co proceso de actualización e modernización das infraestruturas que conforman o conxunto cultural de A Matanza. Nestes momentos tócalle ao auditorio, que está en obras de reforma por importe de 180.000 euros, financiados con fondos da Xunta, da Deputación da Coruña e propios da Fundación Rosalía de Castro.
Segundo conta esta, acometer esta obra era un dos seus principais obxectivos nos últimos anos, «dado o deficiente estado no que se encontraba o edificio», con instalacións obsoletas para a cantidade e a calidade da programación que oferta a Casa-Museo e «con partes gravemente deterioradas», como os camerinos e os aseos, que reclamaban melloras urxentes debido ás continuas inundacións producidas por atoparse a unha cota baixo rasante, explica.
Ademais, o edificio, construído en 1985 polo arquitecto Andrés Fernández-Albalat Lois, «contaba con escasos recursos para levar adiante o seu cometido principal: acoller actividades culturais en boas condicións», sinalan dende a fundación padronesa. Esta engade que o inmoble «non dispoñía de iluminación nin de condicións sonoras axeitadas ás necesidades, nin equipamento de son que permita a realización de espectáculos escénicos». Por iso, explica, a reforma do edificio ten o obxectivo de aumentar a capacidade do espazo e volume, para o que se realizará unha readecuación completa do interior da edificación do auditorio na que son imprescindibles adaptacións e melloras que teñen que ver co confort térmico da sala, illamento, calefacción e aireación de acordo ás novas demandas e normativas así como adaptacións de mellora do confort acústico.