Dodro quere activar a súa asociación de mulleres, Malvalila

O Concello busca impulsar un colectivo creado no 2008, con máis de cen socias

[UXÍA LÓPEZ] Dodro quere recuperar a actividade da súa asociación de mulleres, Malvalila, creada no ano 2008 co propósito de poñer á disposición das mulleres as ferramentas necesarias para o seu desenvolvemento persoal e social. O colectivo chegou a ter máis dun cento de socias. Para darlle un impulso traballa a Concellería de Igualdade, Xuventude e Relacións Veciñais, da que é titular Ana Muñiz.

Como representante do goberno local e como muller fala de que «xa hai moito tempo que lle estou dando voltas á idea de retomar a actividade da Asociación de Mulleres de Dodro», unha vez que nunca foi dada de baixa no rexistro oficial, afirma. «Empezouse a deixar a actividade ata que se deixou de todo», explica a concelleira.

Ese mesmo interese seu é compartido por outras veciñas do municipio, segundo conta Ana Muñiz, que cre que «non habería problema ningún en activar a entidade» e di que mesmo podería ser un bo camiño para volver á normalidade, á vida, coa celebración de actividades de todo tipo, tal e como sucedía cando foi creada a asociación. «A través do Concello fanse cousas neste eido pero penso que a través da asociación se poden facer moitas máis, sen contar que é un punto importante de reunión», sinala a concelleira do goberno de Dodro. Dende o executivo falan de que a «as mulleres do medio rural forman un piar fundamental para conseguir os cambios sociais e económicos». Por iso, engade que a Concellería de Igualdade, Xuventude e Relacións Veciñais pretende dar un impulso a esta asociación e retomar o traballo coas mulleres do entorno, «fomentando o empoderamento e tecendo redes de solidariedade».

O Concello di que ten claro que o asociacionismo feminino será unha «peza clave no pleno desenvolvemento do concello», perseguindo a transformación da realidade a través da participación das mulleres, «sendo estas as únicas protagonistas da súa propia vida». Nesta liña, acaba de incorporar por primeira vez unha técnica en Igualdade, ademais de organizar actividades con motivo do 25N, entre elas unha andaina.

«Penso que non habería problema ningún en recuperar a entidade»

[P. RODRÍGUEZ] Terceira andaina contra a violencia de xénero do Concello