Dodro, ante o reto de sacar as Brañas do abandono e o olvido

O Concello, pendente da concesión dos terreos de Costas

[UXÍA LÓPEZ] Dodro ten por diante un reto inmenso: recuperar o espazo natural das Brañas de Laíño unha vez que Demarcación de Costas, organismo dependente do Ministerio de Transición Ecolóxica, autorice, tal e como anunciou, a concesión dos terreos necesarios para xestionar o espazo cos veciños e permitir os usos tradicionais. Como primeiro paso, o Concello xa se puxo en contacto con varios organismos que teñen afectación sobre o terreo, que se sitúa nas beiras do río Ulla, «para ver ata onde se pode chegar coa recuperación», en palabras do alcalde de Dodro Xabier Castro Tourís, que deixa moi claro que o seu goberno non vai tomar ningunha decisión sobre o espazo que «implique un prexuízo para o Concello ou para os veciños», que teñen propiedades nas Brañas. Deste xeito, asegura que o Concello quere ser un «catalizador de actuacións, un «polo de movemento» para «quitar as Brañas da situación de abandono e esquecemento no que están actualmente».

Nesa liña, o Concello segue en contacto coa Fundación RIA e o seu proxecto de investigación-acción Laboratorio Ecosocial do Barbanza, promovido ademais pola USC a través do grupo Histagra, de modo que lle solicitou á universidade un informe técnico xurídico para determinar que «aproveitamentos pode ter o espazo». Ao mesmo tempo, ten solicitada unha entrevista coa directora xeral de Patrimonio Natural para ver as limitacións á hora de actuar, tendo en conta que o espazo está dentro da Rede Natura e que «pode ser complicado facerse cargo dun terreo tan grande e afectado por tantos organismos», di o rexedor.

Independentemente das actuacións, Xabier Castro ten claro que haberá que facer unha campaña informativa para os veciños que son titulares de parte do terreo, para poder facer unha actuación na totalidade do mesmo. Iso será a partir da concesión dos terreos de Costas, cando, ademais, se definan as colaboracións do organismo do Ministerio de Transición Ecolóxica na recuperación das Brañas, tendo en conta para iso o proxecto que queira desenvolver e presentar o Concello de Dodro. Namentres, Costas acometeu traballos de recuperación e renovación nos accesos ás Brañas, substituíndo asfalto por un material máis acorde co medio.

[MERCE ARES] A Lei de Costas sumiu no abandono o espazo das Brañas