La Voz de Galicia (Santiago) - El Comarcal Santiago
Dodro organiza charlas para mellorar o benestar dos veciños
Saúde mental, evitar fraudes e accidentes son algúns temas
[UXÍA LÓPEZ] O Concello de Dodro ofrece charlas para o benestar dos seus veciños, organizadas polo departamento de Servizos Sociais e Benestar. Trátase, segundo o concelleiro responsable de área, Xoán Bautista Mariño, de ofrecer a toda a poboación información, divulgación e respostas que teñen ver con temas sobre a súa saúde e benestar en xeral e que «a xente demanda e necesita», sinala o edil.
Deste xeito, a primeira charla correu a cargo da asociación Andaina Pro Saúde Mental, con sede en Dodro e Ordes, de modo que a traballadora social Cristina Canosa falou da importancia de coidar a saúde mental en tempos de pandemia. Na segunda, a psicóloga Verónica Verdía deu a coñecer un programa de Andaina para a mellora na detección e intervención en risco de suicidios nas comarcas do Ulla-Sar e Ordes.
Nesta liña de charlas, o programa pioneiro Dodro escoita quere abordar o tema da seguridade cidadá para as persoas máis vulnerables. Así, o Concello foi dos primeiros en alertar o verán pasado de posibles fraudes que se están dando en domicilios, por teléfono e Internet. De feito, hoxe mesmo se celebra unha charla impartida pola Garda Civil para evitar este tipo de enganos, dirixida a toda a poboación.
Tamén están previstas outras convocatorias, como a de prevención de accidentes en vías públicas, impartida por persoal especializado. Hai, ademais, outras citas previstas para falar da saúde psicolóxica, do risco laboral e de prevención de condutas. Todas se celebran no local municipal do centro de día de Dodro.
A organización destas charlas trata de suplir, en parte, as actividades presenciais que se celebraban antes da pandemia, tales como os distintos obradoiros, unha vez que moitos veciños aínda son reacios a xuntarse de novo, segundo conta o concelleiro.
Xoán Bautista Mariño tamén explica que as traballadoras do servizo de axuda ao fogar xa se incorporaron tras o seu período de vacacións, que o Concello non pode cubrir, como tampouco o pode facer co posto da educadora familiar. Pola súa banda, a traballadora social contratada a raíz da pandemia rematou o contrato dun ano e o Concello quere volver a pedir a subvención á Deputación para volver a cubrir o posto, que o edil ve moi necesario.