La Voz de Galicia (Santiago) - El Comarcal Santiago
«Temos que abrir mentalidades, viaxar, ver proxectos e adaptalos á vila»
Beiró avoga en Padrón por un crecemento que conxugue o económico co patrimonio
[uxía lópez] Para o veciño de Padrón Xosé Carlos Beiró Piñeiro, de 61 anos, licenciado en Xeografía e Historia pola Universidade de Santiago e autor e coautor de numerosas publicacións relacionadas coa historia e a etnografía da comarca, na capital do Sar «temos uns bos vimbios cos que facer un bo cesto: Camiños de Santiago; figuras emblemáticas de importancia mundial como Rosalía de Castro e Camilo José Cela e patrimonio arqueolóxico, civil, relixioso e natural».
Por iso, fala de que «todos, sen distinción económica ou ideolóxica, individual ou colectivamente, debemos preservalos, dalos a coñecer e procurar dotar a aqueles vimbios dunha axeitada feitura da que sentirmos orgullosos».
Botando unha ollada atrás, Xosé Carlos Beiró ve que a vila «modificou substancialmente o seu aspecto nas últimas décadas do século pasado». Así, cre que «o papel primordial que xogou Padrón como centro económico e como lugar de converxencia de vías propiciou un gran desenvolvemento que serviu de xerme á situación actual».
Deste xeito, conta que esas condicións «propiciaron unha gran circulación de persoas e provocou unha clara atracción urbanística para unha poboación que intentaba mudar do rural ao mundo urbano». Con ese movemento de persoas, di que se «fixo preciso habilitar novas vivendas, pero este desenvolvemento non se viu acompañado dun crecemento racional». Engade que iso, unido á falla de planificación e á de optar por un planeamento urbanístico que facilitou un crecemento irracional, propiciou a construción en altura dos novos edificios, é dicir construír máis no mesmo terreo e derivou na desaparición de inmobles e espazos senlleiros en favor de vivendas faltas de personalidade».
En presente, fala de que «a mellora de servizos; abaratamento de prezos da vivenda e dos locais comerciais e a mellora de comunicacións serían algunhas das accións esenciais que favorecerían o crecemento da comarca». Todo sen esquecer o papel primordial que xoga a cultura en Padrón.
Para o veciño e historiador padronés, «temos que abrir mentalidades, viaxar, ver proxectos en vilas e cidades e adaptalos a nosa realidade».
En resume, Xosé Carlos Beiró sinala que «temos que artellar actuacións e políticas que conxuguen o crecemento económico co patrimonio cultural; temos que facelos compatibles porque se perdemos este último perdemos a nosa identidade».