La Voz de Galicia (Santiago) - El Comarcal Santiago
Vedra apoia e forma a mulleres para seren autónomas
[UXÍA LÓPEZ] O Concello de Vedra ten en marcha o programa denominado Mulleres +, de apoio e formación a veciñas de grupos vulnerables. Ten como obxectivo mellorar a posición de mulleres de grupos vulnerables no acceso ao mercado laboral 2.0 e ao sector tecnolóxico e dixital, despois de que o Concello fixera unha análise da situación entre este colectivo tras a pandemia.
Así, Mulleres + nace a partir de que o Concello detecta unha baixa taxa de actividade das mulleres de Vedra. A falta de formación en Tecnoloxías da Información e Comunicación (TIC), entre outras razóns, aumenta a dificultade á hora de conseguir un posto de traballo e isto, a súa vez, provoca unha falta de motivación, aseguran dende o Concello.
Deste xeito, detectou problemas para acceder a certos servizos e de aí que organizase un programa para difundir a igualdade, a autonomía e o empoderamento das mulleres, para que teñan voz e poidan decidir que facer e como facelo, en palabras de Carmen Sabio, educadora familiar e técnica de Igualdade de Vedra.
Pola súa banda, a concelleira de Benestar Social, Muller e Igualdade e Persoal, Susana García, explica que tiveron unha experiencia piloto que dou moi bos resultados. «Gustaríanos que participaran todas as mulleres de Vedra, de calquera idade ou condición, xa que se trata dun programa moi interesante, gratuíto e cuns contidos moi necesarios tanto a nivel profesional como persoal».
Deste xeito, Mulleres + non se trata unicamente dun programa de formación. O empoderamento da muller, a mellora das habilidades sociais e o desenvolvemento persoal son eixes principais da iniciativa, que se desenrolará ata xaneiro de 2023.
Participan unhas 16 mulleres, repartidas en dous grupos, un no edificio da Estación de Santa Cruz de Rivadulla e o outro no centro social de Vedra. O programa desenvólvese de dous modos. Por un lado, con sesións grupais que facilitan o traballo e, por outro, individuais, que son moi importantes para que cada beneficiaria exprese as súas necesidades.
Entre as actividades, este mes houbo charlas sobre dietética e nutrición, impartidas por unha experta no centro social de Vedra.