Rois ten no veciño Xurxo Neo a todo un campión de trial

O mozo de 15 anos de Urdilde estréase na categoría júnior da moto de 300 cc.

[uXía lópez] Rois ten un campión sobre a motocicleta. É Xurxo Neo Suárez, veciño de Urdilde de 15 anos e que leva dende os 6 competindo na modalidade de trial, aínda que a primeira vez que se subiu a unha moto foi aos 4 anos, animado polo seu pai Javier que é un afeccionado dese mundo. E, dende aquela, xa non baixou da moto e non parou de recoller éxitos. Entre eles, foi campión nacional xuvenil dous anos na categoría de 125 centímetros cúbicos, na que tamén foi subcampión cadete. Agora mesmo está inmerso no campionato europeo na categoría Youth. Na primeira proba, disputada en León, alcanzou o segundo posto. Na segunda proba, disputada na localidade francesa de Breal sous Montfort, o mozo tamén quedou de segundo. Neste campionato, para mozos de entre 12 e 16 anos, o veciño de Urdilde compite cunha moto de 125 cc.

Xurxo Neo estréase este ano na categoría júnior de 300 centímetros cúbicos, na que competirá no campionato de España. Conta o piloto que este primeiro ano «é para aprender o máximo posible e coller experiencia» para, de cara á vindeira tempada, «loitar polas vitorias». O veciño de Urdilde compaxina a súa afección cos estudos de terceiro curso de Educación Secundaria no IES de Brión. Adestra os sábados e domingos e, se pode, tamén algún día da semana, en espazos preto de casa aínda que recoñece que «cada vez é máis difícil compaxinar a súa afección cos estudos».

Pero, mentres poida, vai seguir facéndoo porque é feliz subido a unha moto aínda que é consciente de que é complicado dedicarse de cheo so a iso. «Véxoo posible, pero é moi difícil porque tes que destacar moito para que as marcas se fixen en ti e che financien».

Neste sentido, conta co apoio dende o primeiro momento do Concello de Rois, que lle dá moita visibilidade a través das redes sociais, pero tamén co respaldo económico de distintas marcas: Senrasport Ángel Leirós Motos; Brión Motor; VidrioTeo; Silmaplast; Barpimo e TCG Noia.

[pacO rODríGUEZ] Xurxo Neo ten dúas motos idénticas, unha para adestrar e outra para competir. Do seu mantemento ocúpase o seu pai, Javier. Adestra nas fins de semana e, se ten tempo, algunha vez tamén pola semana, en espazos próximos á súa casa de Urdilde