La Voz de Galicia (Santiago) - El Comarcal Santiago
As Brañas de Laíño, en Dodro, volven a ter un uso gandeiro
As vacas de carne do veciño Miguel ríos pastan e manteñen limpos terreos que estaban abandonados á beira e no entorno do río ulla
[UXÍA LÓPEZ] As Brañas de Laíño, en Dodro, volven a ter un uso gandeiro grazas á iniciativa do veciño da aldea de Vigo Miguel Ríos Freirías, de 42 anos. Neto de tratante, a Míchel, como é máis coñecido, sempre lle gustaron os animais e traballar ao aire libre. Hai seis anos mercou a primeira vaca; despois outras tres e así sucesivamente ata ter 24 na actualidade, xunto cun toro e 14 becerros, nunha explotación extensiva de carne da que é titular.
Está adherido á Indicación Xeográfica Protexida Tenreira Galega e a de Boi e Vaca Galegos e os seus animais están axudando a recuperar parte dun espazo ata o de agora totalmente abandonado: as Brañas de Laíño e o seu entorno.
Pastan nunhas 30 hectáreas de terreo, ao que hai que sumar máis para cultivo de millo e herba, na inmensa maioría cedido por veciños que deixaron de traballalo dende que a Lei de Costas lles limitou os usos e mesmo a titularidade sobre os mesmos.
Agora, as vacas de Míchel pastan na zona e mesmo chegan ata o río Ulla, no que beben. «Eu limpei moito, sobre todo o silveiral, pero as vacas limparon moito máis e manteñen todo limpo», conta o gandeiro. Este reclama que lle permitan limpar máis terreo ou que o limpen e, sobre todo, que se abran os gabias para evitar que a zona se inunde de modo que se lle poida sacar máis proveito no inverno.
«Se puidera limpar máis terreo, aumentaría o número de animais», asegura o veciño de Dodro, quen fala de que, ata a chegada das vacas, a zona «era unha selva, chea de alimañas, incluído o porco bravo que é unha peste», di. «É penoso como está a zona; pensaron que a protección ecoloxista era a solución e agora danse conta de que foi todo o contrario, que propiciou o abandono», opina. As súas vacas son de carne e pastan nunha zona que antano foi a maior despensa de herba da comarca para animais de leite, ata o punto de que en Laíño se fundou unha das primeiras cooperativas leiteiras de Galicia.
Tamén destacou polos bois cebóns, algo que quere recuperar Míchel. «Oxalá houbera máis xente que quixera ter animais e manter todo isto limpo; eu anímoos aínda que o momento non é o mellor polos baixos prezos da carne e os altos dos pensos, pero isto terá que cambiar».
Ver as súas vacas pastando dende a estrada leva a moitos a pensar en tempos pasados, de esplendor das brañas, cando todo eran campías e pradarías, na vez do actual matorral.
«Se deixaran limpar dende a ponte do río San Lufo, en Vigo, ata a recta de Laíño, poderían terse uns 100 animais», di antes de engadir que dende a ponte do río ata Cancela Abrea hai outra «extensión de terreo moi grande para aproveitar».
Nos últimos tempos, o Concello ten constancia de que Costas se abre a buscar un aproveitamento sostible das Brañas, de modo respectuoso co medio e a súa condición de Rede Natura e a actividade en extensivo de Míchel podería ser unha delas.