La Voz de Galicia (Santiago) - El Comarcal Santiago
«Queremos unha romaría familiar como as de antes»
[natalia noguerol] En Touro, son coñecedores máis cá ninguén da importancia que ten no devir colectivo o Ulla, que non só deu pé a facer do municipio un referente do turismo de natureza vinculado ao sendeirismo, con varias rutas que teñen o río como guía.
O leito fluvial inspirou o nome dun festival co que un grupo de veciños se marcou como meta poñer en valor a música tradicional galega, pero tamén recuperar as romarías de vello; esas que eran escusa para un xantar familiar á beira dun río. «A nosa idea non é facer un festival competitivo, senón todo o contrario; queremos facer unha romaría como as que había antes, unha festa familiar, que se están perdendo», explica Xabier Ferro, da asociación cultural As Sobreiras do Ulla.
E con esa filosofía, e logo de dous anos sen celebrarse por mor da pandemia, regresa a Touro, Folk in Río, un encontro no que ten cabida xente cativa, moza e maior. «O que nos enche de orgullo é ver aos avós presumir diante dos netos de como manexan os zancos ou os aros», di Ferro, logo de incidir en que o colectivo do que forma parte, organizador do festival, tece unha programación para dar resposta a todas as idades. A área recreativa da Santaia, á beira do río Brandelos, afluente do Ulla, acollerá o 3 de xullo o festival, cun cartel con artistas de excepción aos que os organizadores lles están especialmente agradecidos. Son os mesmos que tiñan contratados na edición que no 2020 frustrou o confinamento: Os Viqueiras, de Ordes; Os Melidaos, e Xabier Díaz. «Todo foron facilidades, comportáronse estupendamente», afirma Ferro.
Non serán os únicos músicos que amenizarán a xornada na extraordinaria carballeira da área de recreo, localizada a un quilómetro aproximado da capital municipal de Touro, Fonte Díaz, onde, contra ao mediodía, dez agrupacións de música amenizarán cinco locais de hostalaría con populares cantos de taberna. Xogos tradicionais, unha mostra de artesanía e a actuación de Pakolas para o público infantil tamén están programadas para o goce no Folk in Río, que volve convidar na área recreativa da Santaia a unha romaría de campo á beira das augas que deixa o Ulla ao seu paso por Touro.