La Voz de Galicia (Santiago) - El Comarcal Santiago
Un plan de sáude local para combater o sedentarismo
Elisa capelo, técnica municipal de deportes de Santa comba, fixo un traballo sobre actividade física en Xallas e Negreira
[EMILIO FORJáN] Elisa Capelo é técnica de Deportes no Concello de Santa Comba e, como traballo de fin de máster, elaborou unha completa memoria da promoción da actividade física para a saúde nas comarcas de Xallas e Barcala, partindo dos datos proporcionados polos departamentos de Deportes dos concellos de Santa Comba e Negreira. Define as actividades deportivas, as instalacións de cada concello, así como clubs e entidades existentes, e maila promoción da actividade física dende outros departamentos.
Como introdución a este traballo «fixen mención aos distintos significados que teñen estas tres palabras e que normalmente se utilizan indistintamente en calquera contexto, cando non debe ser así: exercicio físico; deporte e actividade física», subraiou. Elisa plantexou esta temática por iniciativa privada, como algo que «eu puidese aplicar ao meu traballo diario, e dada a boa relación cos compañeiros de Negreira», apunta. Un traballo moi laborioso de meses, comenta Capelo, que partiu da recompilación de todas as actividades que se realizan nos dous concellos.
Hai unha parte, diríamos que fundamental do traballo, a cal está orientada a enfermidades crónicas non transmisibles (ECNT), onde di Elisa que «o sedentarismo é unha das mais importantes, entre outras». Este traballo foi elaborado no 2019 e agora en Santa Comba, plantéxase a necesidade de facer un Plan de Saúde Local, cunha iniciativa que parte desde o Centro de Saúde para os municipios de Santa Comba e Mazaricos. «Necesitamos unha sociedade máis activa, ou non tan sedentaria. Agora a xente coñece os beneficios que produce a actividade física e o demanda. Nas enfermidades crónicas non transmisibles unha das principais causas de morte é o sedentarismo». E vindo dunha pandemia, é necesario, alude, que interveñan outros aspectos como o psicolóxico, e recalca a necesidade de fomentar a actividade física saudable, que é algo no que insisten os profesionais médicos.
Elisa destaca o traballo que se leva a cabo con persoas adultas en Santa Comba: «A nivel físico e de interacción social, os resultados son moi positivos para reducir o consumo de fármacos, algo no que inciden dende o Centro de Saúde para poñer en marcha un Plan de Saúde Local», manifesta a autora do traballo.
O groso do seu traballo analiza e menciona o Plan Galicia Saudable (211/2015); do Plan A+D do Consello Superior de Deportes, así como as recomendacións da Organización Mundial da Saúde (OMS), en relación coa actividade física. Isto permitiulle a Elisa Capelo realizar un estudo da promoción da actividade física nos dous concellos en relación cos dous plans saudables e mailas recomendacións da OMS. Elisa afirma que, en liñas xerais, a conclusión é que estase traballando «bastante ben», polo cal fixo bastante fincapé noutros departamentos como Servizos Sociais, os Centros de Información á Muller e en Cultura, «onde comprobei que debemos traballar máis e de forma máis coordinada entre departamentos municipais», segundo sinala Elisa, quen fai referencia a actividades como as andainas saudables.
«En enfermidades crónicas, unha das principais causas de morte é o sedentarismo»
«Destaca o traballo que se leva a cabo con persoas adultas en Santa Comba»