Amipa mira ao futuro e quere vivendas tuteladas

O colectivo reivindica a inclusión social no rural das persoas con discapacidade

[UXÍA LÓPEZ] Amipa, a Asociación de Nais e Pais de Persoas con Discapacidade Intelectual da Comarca do Sar, cumpriu 25 anos. Fíxoo reivindicando a inclusión social das persoas con discapacidade intelectual no rural, pero tamén mirando ao futuro e sinalando as súas inquietudes e necesidades: poñer en marcha vivendas tuteladas; contar cun centro de día; ter un servizo de apoio para as familias; participar en actividades da comunidade e de ocio personalizado e establecer alianzas ca veciñanza, coas asociacións, coas empresas e cos Concellos. De todo iso falaron os usuarios no vinte cinco aniversario de Amipa, entidade que naceu o 14 de maio de 1997 a iniciativa de catro nais e un pai. Nesta andadura, destaca o ano 2003, cando a modesta rede de talleres rurais dos tres concellos empezaron un proxecto común en Padrón, nos baixos da piscina municipal.

En 2005 houbo outro fito importante para a entidade: a empresa Stac formou aos usuarios no traballo manipulado de aluminio, un sector con gran peso na comarca. Detrás de Stac viría outra empresa, Nestlé, e para as dúas seguen a traballar hoxe en día.

Así o local de Padrón quedou pequeno, e no ano 2010, Amipa trasladouse á casa reitoral de Sorribas, rehabilitada tras a cesión por parte do Arcebispado. Alí funciona agora o seu Taller Ocupacional, no que reciben formación integral e á que sumaron tamén os talleres de artesanía, no que participan 17 usuarios. O 2017 marcou outro fito importante para Amipa xa que incorporou a usuarios de municipios de fóra da comarca do Sar, en concreto de Brión e Teo. No 2019 deseñou un plan de mellora, para o futuro que quere.

Amipa é, como di o seu presidente José González, «un soño feito realidade, un proxecto ilusionante no que seguiremos traballando nos seguintes 25 anos pola inclusión plena e real das persoas con discapacidade, sumando a forza de moita xente para unha sociedade máis xusta».

Fotografía de familia na horta da casa reitoral de Sorribas, cos 24 usuarios de Amipa xunto cos profesionais que traballaron nalgún momento na entidade nos 25 anos que acaba de cumprir ou que traballan na actualidade, incluído persoal dos tres Concellos do Sar.