La Voz de Galicia (Santiago) - El Comarcal Santiago
Dúas empresas de tempo libre de Vedra achegan o Camiño aos máis novos
É a través dun programa do Concello para coñecer o seu territorio e as peregrinacións
[uxía lóPEZ] Máis alá de albergues e outro tipo de establecementos para aloxar ou atender peregrinos, o Camiño de Santiago crea no municipio de Vedra riqueza para outro tipo de negocios, como son as empresas de ocio e tempo libre. Elas son parte fundamental para desenrolar o proxecto impulsado polo Concello e titulado Vedra A Través que, entre outros obxectivos, pretende fomentar o coñecemento do Camiño entre os máis novos.
O programa está dirixido á comunidade escolar e, con esta iniciativa, o Concello busca unha aproximación didáctica ao territorio dando a coñecer o importante patrimonio natural, cultural, arquitectónico e etnográfico de Vedra en particular e da comarca natural da Ulla en xeral. Entre eles, recursos turísticos locais, como os pazos, os muíños, o río Ulla e, por suposto, o Camiño, neste caso a Vía da Prata.
Deste xeito, as empresas Anacos e Galicia Eventos e Ocio (GEO) organizan andainas por tramos do Camiño, concretamente entre os núcleos de Ponteulla e
Vilanova, un tramo de catro quilómetros que percorren os escolares de máis idade aínda que para os de Infantil o traxecto é menor, dun quilómetro.
Chío Couto Rendo, de 36 anos, é titular da empresa Anacos e conta que a idea é achegar o Camiño e a peregrinación aos máis pequenos; que coñezan máis da ruta; das súas etapas e das particularidades e curiosidades que ten ao seu paso por Vedra. Ao mesmo tempo, os menores tamén fan xogos e probas, relacionados co
Camiño. «E marchan coa experiencia vivida», conta Chío Couto. Nalgún caso o tramo elixido tamén entra no concello de Boqueixón.
A iniciativa está dirixida, inicialmente, ao ámbito escolar pero dende Anacos explican que se outro colectivo quere participar nela tamén é posible. Ademais, a idea é manter esta actividade no tempo, tal e como explica Chío Couto.
Pola súa banda, David Neira, de 35 anos e da empresa Galicia Eventos e Ocio fala de que o programa Vedra a Través está sendo unha «experiencia boa», coas catro rutas de sendeirismo que promove. En concreto, sobre a actividade vinculada ao Camiño de Santiago destaca que o seu percorrido vai acompañado de probas para superar e remata cun gran xogo final a modo de scape. O titular da empresa incide en que a finalidade do programa é achegar o camiño aos máis novos, dende a peregrinación ao significado da ruta para o concello. Xa participaron varios colexios, entre eles todos os de Vedra, pero tamén doutros concellos como Brión, Ames ou Negreira. A idea é, ademais, abrir a actividade a outros colectivos, como poden ser os grupos familiares ou os estudantes universitarios.
Dende o departamento de Turismo do Concello de Vedra explican, ademais, que este tipo de actividade é extrapolable tamén ao Camiño Miñoto Ribeiro, unha das rutas más antigas que enlaza o norte de Portugal coa cidade compostelá. Este itinerario, que nunha das últimas etapas pasa por Vedra, ten o recoñecemento da Igrexa dende o ano 2020, pero falta o da Xunta e para conseguilo traballa a Asociación de Amigos do Camiño Miñoto Ribeiro.
En canto ao programa Vedra a Través, dende o departamento de Turismo do Concello convidan «a que gocedes desta experiencia e desta terra, que foi e é horta e xardín de Compostela». Así, engaden que é unha boa alternativa para descubrir, percorrer e admirar a diversidade do contorno, permitindo conxugar a aprendizaxe coa diversión.