La Voz de Galicia (Santiago) - El Comarcal Santiago
Mel Berce de Vedra, o mellor en calidade a nivel internacional
[UXÍA LÓPEZ] Mel Berce, de Vedra, suma un novo recoñecemento. O mel dos irmáns José e Rubén González Novoa, de San Miguel de Sarandón, acaba de obter o ouro no London Honey Awards 2022, o certame internacional de máis prestixio do sector. O premio súmase á prata do ano pasado, nos dous casos concedidos ao seu mel multifloral.
«É unha alegría moi grande», conta José González, quen engade que o certame «premia a calidade do mel polo que é un prestixio que colles». Os irmáns dedícanse á apicultura de forma semiprofesional dende hai uns quince anos, despois de mamar o oficio na casa dos avós, onde sempre houbo abellas. «De aí nos ven o gusto», sinala o apicultor.
Teñen as colmeas nunha finca propia en Sarandón, en Vedra, e no concello de Forcarei. Neste último lugar restauraron unha alvariza e contan de sacar este ano unha produción completa. Así, contan de extraer, en total, uns 3.000 quilogramos de mel, 1.000 máis que o ano pasado que, segundo contan, non foi bo.
Aparte do mel multifloral, tamén teñen do de castaño. Venden toda a produción no comercio local, de proximidade, e tamén pertencen a unha cooperativa onde o venden a granel. Teñen páxina web, que está en actualización, pero de momento non teñen venda en liña porque, como explica José González, «é un mel totalmente natural», que se comercializa mesmo boca a boca.
En canto ao nome, Berce, elixírono porque as colmeas están, por un lado, no berce do río Ulla (Vedra) e no do río Umia (Forcarei). «Conxugamos dúas zonas que teñen un microclima especial e pola súa variedade de floración», conta o apicultor.
A maiores, no ano 2020, o seu mel obtivo o premio do Concurso de Meles 5 Estrelas da asociación Galega de Apicultura (AGA). Era o primeiro ano que se presentaban ao curso da AGA e Berce, como vencedora, obtivo o selo Mel 5 Estrelas para utilizar nos seus envases.
Nestes anos, os produtores de San Miguel de Sarandón souberon conxugar a apicultura tradicional que realizaban os seus avós cos novos avances para optimizar os procesos sen perder o rigor e a excelencia na produción.