La Voz de Galicia (Santiago) - El Comarcal Santiago
Case 400 veciños de Brión irán a actividades o vindeiro curso
Organizadas polo Concello, son culturais e deportivas
[uxía lópez] O Concello de Brión foi previsor e xa abriu as inscricións para as actividades culturais e deportivas do vindeiro curso 2022-2023. Deste xeito, este ano optou por que as renovacións fosen automáticas, polo que aquelas persoas que non quixeran continuar na actividade elixida debían comunicalo antes do 15 de xullo. De acordo con cifras aportadas polo Concello, renovaron praza 342 persoas. A maiores, 51 máis apuntáronse no prazo de novas reservas.
O programa de actividades, que dará comezo o día 3 de outubro, inclúe unha quincena de propostas deportivas e culturais tanto para os nenos de Brión como para persoas adultas. Os prezos mantéñense con respecto ao último lustro, é dicir, 80 euros ao ano por actividade, novamente coa excepción de ioga, que é de 120 euros por anualidade.
O Concello de Brión mantén tamén os descontos establecidos o ano pasado para segunda actividade e familias. Outra novidade do vindeiro curso é que o Concello permitirá un período de proba das actividades de 15 días, durante o cal as persoas poderanse dar de baixa sen ter que pagar ningunha penalización. As baixas poderán tramitarse antes do 15 de outubro ou do 1 ao 15 de febreiro, no segundo cuatrimestre.
O programa de actividades culturais inclúe a Escola Municipal de Danza e Música Tradicional, que ofertará catro cursos: baile galego; pandeireta; gaita e percusión e iniciación á música e ao baile tradicional. Cada un dos cursos ten un custo de 80 euros ao ano. O programa tamén inclúe dúas actividades na área de escolas artísticas: catro grupos de iniciación á pintura e dous grupos de teatro infantil e xogo dramático. Os prezos son de 80 euros por curso.
No que atinxe ás actividades deportivas, a oferta do Concello de Brión abrangue 155 prazas, 20 para adultos e 135 para menores de 16 anos. Por outra banda, as actividades de conciliación do verán tiveron moito éxito, superando as cifras de antes da pandemia. Así, a primeira quincena do campamento de conciliación de xullo tivo 125 nenos e na segunda, 120. En agosto e setembro esa participación baixa a 70, pero segue sendo superior a outros anos. Tamén o campamentos xuvenil incrementaron moito a súa participación e hai 59 anotados.