La Voz de Galicia (Santiago) - El Comarcal Santiago
Un percorrido polo pasado de Vedra
O concello esconde miradoiros, entornos naturais e xoias arquitectónicas para todos os gustos
[LUCÍA BLANCO] Aínda que unha única xornada non é suficiente para achegarse a todo o encanto que caracteriza o concello de Vedra, pode ser suficiente para coñecer algún dos segredos que esconde, moitos deles con varios séculos de vida. O Pazo de Ortigueira, declarado Ben de Interese Cultural dende o 2001, é unha das visitas imprescindibles. Ademais do seu estilo arquitectónico, e de ser un gran exemplo da tradicional construción señorial galega, destaca polos seus xardíns ornamentais, que se atopan entre os máis importantes da comunidade.
Desfrutar do son da auga que cae no regato do Castilán, pasear entre as camelias ou identificar as 14 variedades de árbores senlleiras que se sitúan na súa contorna son algúns dos seus atractivos. O conxunto histórico de Ponte Ulla é outra das paradas obrigatorias. Nela atópase o popular miradoiro da ponte de Gundián, construción dos anos 50 que supuxo todo un reto para a época debido á presenza do salto de San Xoán da Cova, onde o río forma un estreito cunha caída de máis de 100 metros de altura. Aínda que os viadutos son o sinal de identidade da parroquia, un paseo pola rúa principal tamén traslada aos visitantes á historia do lugar. Concretamente, ao século XII, cando os peregrinos procedentes da Vía da
Prata chegaban á vila esgotados, en busca de descanso na igrexa de Santa María Madalena. O templo románico goza dun moi bo estado de conservación pois, a día de hoxe, conserva a ábsida e os contrafortes orixinais, así como frescos do século XVI no seu interior.
A capela de Gundián, á que se accede tras cruzar a Ponte Vella, é outro dos tesouros que alberga a parroquia bañada polo río Ulla. Segundo a tradición, os máis pequenos débense lavar nas augas da súa fonte e deixarlle a súa roupa como ofrenda á virxe para curalos. Precisamente para os máis cativos, a visita á área de interpretación dos muíños de Vedra é outra das opcións. A ruta de dous quilómetros, na que se amosa o funcionamento dos muíños de canle, é perfecta para achegarse aos costumes da zona en familia.