La Voz de Galicia (Santiago) - El Comarcal Santiago
A Baña recupera o seu trail e organiza un torneo de xadrez
[e. forján] A Concellaría de Promoción da Vida Activa e Deporte da Baña traballa arreo na programación de actividades para o vindeiro outono. Entre elas sobresae o regreso do Trail da Baña, que se desenvolverá o domingo 2 de outubro, e a ampliación a disciplinas coma o tenis e o judo, dentro da oferta das escolas deportivas municipais, para as que o Concello da Baña e o de Negreira asinarán un convenio de colaboración en materia de escolas, para ceder o campo de fútbol a equipos do veciño concello barcalés.
O Trail da Baña incluirá unha distancia longa de 24 quilómetros, e un mini trail de dezaseis, con esta mesma distancia para a andaina e un trail para pequenos. Asemade, o 18 de setembro celébrase o primeiro Torneo de Xadrez, no polideportivo de San Vicenzo, a través da modalidade rápida, e valedeiro para o sexto Circuito Intercomarcal da Deputación da Coruña, con premios en metálico. Xa de cara ao vindeiro ano, para o mes de marzo están traballando na oganización dun duatlón solidario na localidade.
O Concello da Baña tamén vai colaborar coa SD A Baña, que competirá con equipos de benxamín, alevín e infantil, e unha vez aprobados os orzamentos municipais van a asinar os convenios coa
SD A Baña, A Baña Veteranos e A Baña Futsal. Tamén se está a mellorar o campo de fútbol de Cartas, que contará cun terceiro vestiario para que os equipos mixtos dispoñan de suficientes vestiarios. Habilitouse un acceso directo dende o aparcadoiro, pintouse e instalouse un desfibrilador.
César Ramos, concelleiro de Promoción da Vida Activa e Deporte, suliña que están poñendo a funcionar o Plan de Voluntariado: «Queremos contar cun equipo de voluntarios e voluntarias que colaboren nas actividades», indicou.
Incorporación de baile galego
Fóra do eido deportivo, outra novidade vén dada pola reactivación da Escola de Teatro, e dentro da oferta da Escola de Música Tradicional engádese o baile galego. E en breve vaise ofertar un novo curso da Escola de Música, e en setembro pensan celebrar a primeira xuntanza do Consello Político Social da Lingua, que foi aprobado coa ordenanza de impulso da lingua galega.