«Motivamos que a muller saia da casa e se relacione»

A Asociación de Mulleres Rurais de Melide traballa no apoderamento feminino cun programa de ocio e formativo con 65 actividades.

[natalia noguerol] urora Fernández (Galegos, Frades, 1971) cre a cegas no potencial das mulleres, e reivindica o recoñecemento do rol que desempeñan na construción da sociedade. Faino de xeito activo e altruísta dende Alecrín, un colectivo sen ánimo de lucro no que «representamos a mulleres que viven e traballan no rural». Forman unha lexión de 900 compañeiras.

—Por que naceu Alecrín?

—A asociación creouse coa motivación de que as mulleres rurais teñan e poidan acceder á formación, cultura, ocio e servizos, e para darlles visibilidade e axudalas en todas as súas necesidades e inquietudes da vida diaria. Nas aldeas e nas vilas pequenas hai carencias nese sentido, e dende o convencemento de que unha muller é capaz de moitísimo, e de que moitas xuntas somos máis fortes, asociámonos como mellor maneira de acadar eses fins. Sete anos despois da constitución de Alecrín, outros dos nosos obxectivos son a saúde da muller, tanto física coma mental, e a igualdade de dereitos e oportunidades. —En que medida condiciona á muller residir no rural?

—O principal problema é a soidade. Vivir no rural é precioso, pero faltan infraestruturas: a algúns lugares non chega o transporte para poder desprazarse, o acceso a Internet, aínda que mellorou, deixa zonas con moi mala cobertura, sendo, como é, un servizo esencial; para nós, en concreto, porque outros dos grandes obxectivos da asociación é a dixitalización da muller. Ademais, tamén

unha saída»

nos atopamos coa dureza de traballar no rural. Moitas veces, a muller esquécese de coidar de si mesma, e só pensa nos demais, na familia, nas persoas dependentes, debido á carga de traballo e á falta de oportunidades. Estámolo cambiando pouco a pouco, pero queda moito por facer. Necesitamos mulleres que co seu exemplo motiven a outras, que se axuden. —Que capacidade de resposta ten Alecrín ante esa realidade? —Poñemos todo o noso empeño en dar resposta á maioría das demandas, e analizando as necesidades que vemos, aportamos cursos de formación, dixitalización, e actividades de mellora da saúde e de ocio. Tratamos tamén de axudar no emprendemento e na procura de traballo. En definitiva, motivamos, na medida do posible, que a muller saia do seu fogar, e que, ao fin, poida optar a uns servizos de ocio e formación, e se relacione, conseguindo apoderarse. —Cal é a clave do significativo respaldo social da asociación? —Traballar e atender as demandas, e ofrecer sempre cursos de calidade, con moi bos profesionais —monitores moi especializados— e dunha calidade humana excepcional. Tamén procuramos dinamizar económica, turística e socialmente a comarca con todo o que organizamos, e estámolo conseguindo co festival de ioga e co de bailes latinos. Outra das claves é respectar moito ás demais asociacións da vila, que poden contar con toda a axuda que precisen da nosa parte. —Sendeirismo, danza, ioga, cociña, corte e confección... está falta a programación dalgunha actividade?

—Atopámonos con demandas que non damos cuberto. Non contamos cun local propio, e as administracións non nolo proporcionan. Temos a sorte de que a cooperativa CLUN nos cede o seu centro de formación; o colexio número 1, o seu patio; e algunha socia, locais da súa propiedade.

[pACO RODRíGUEZ] Aurora Fernández encabeza unha directiva de mulleres que, de xeito altruísta, xestionan un colectivo con 900 asociadas.