La Voz de Galicia (Santiago) - El Comarcal Santiago
Volve o feirón de re-Volta o 9 de outubro a Ceilán
O Concello tamén ultima a organización do primeiro roteiro de tapas da Baña
[e. forján] A carballeira de Ceilán acollerá o domingo 9 de outubro a terceira edición da romaría de Re-Volta, que quere recrear o ambiente das romarías de antaño, alá polos anos cincuenta do século pasado. Despois de suspenderse a edición do ano 2019 a causa do mal tempo, e tras dous anos de parón pola pandemia da covid, o segundo domingo de outubro retómase o feirón dentro da programación do Outono Cultural deseñada dende a Concellaría de Cultura.
As actividades do feirón de Re-Volta inclúen música, coa animación de Os Gaiteiros da Baña durante toda a festa; xogos para nenos con Paporrubio, e mesmo contacontos ilustrados con Polo Correo do Vento, e unha sesión de regueifas a cargo de Lupe Blanco. E, por suposto, haberá mercadiño e postos de comida, comezando a festa ás once da mañá, baixo a organización do Concello da Baña coa colaboración da Deputación Provincial da Coruña, así como da Asociación de Veciños O Outeiro.
Coma nas primeiras edicións, haberá postos de venda e exposición de produtos de época, ademais de mostras de oficios. Tampouco faltarán os postos de comida típica galega e unha exposición fotográfica con imaxes antigas facilitadas pola Asociación veciñal O Outeiro, quenes dende os inicios veñen colaborando na cita que rememora unha das feiras de maior solera existentes nas comarcas de Barcala e Xallas como era a feira do Ceilán.
Dende a Concellaría de Cultura, que dirixe a concelleira Lorena Trillo, están inmersos en pechar a primeira edición dun roteiro de tapas polos establecementos hostaleiros do municipio, ao longo das dúas primeiras fins de semana de novembro. «Primarase a utilización de produtos típicos do outono», comenta Lorena, quen destaca a forte aposta en canto a actividades do Outono Cultural, que comprenderá unha programación para os vindeiros meses, a cal irá desenvolvéndose ata decembro.