Firme aposta pola vida activa e o deporte en A Baña

A matrícula nas distintas disciplinas das escolas municipais creceu en 51 persoas

[E. FORJÁN] A práctica deportiva sufriu unha profunda transformación no que levamos de 2022 en A Baña. Ao incremento na oferta de disciplinas que ofrecen as escolas municipais, hai que sumarlle novos eventos que promoven a práctica do exercicio físico e a vida saudable nun municipio de menos de catro mil habitantes, onde é un feito destacable que cheguen a 125 prazas nas súas escolas municipais, un incremento que dende a Concellaría de Promoción da Vida Activa e Deporte, cualifican de «espectacular» por canto o pasado curso foran 74 as persoas inscritas. Os maiores incrementos de participación son en pilates, que pasou de 12 a 20 participantes, ou karate, de sete a once. E cómpre salientar a de baile moderno, con trece usuarios cando o ano pasado non se chegou a impartir por falta dun número mínimo.

Por primeira vez ofrécense modalidades como judo, que ten oito anotacións, e tenis, que se oferta de xeito gratuíto grazas ao plan Corresponsables da Xunta (19). E a nova oferta inclúe balonmán, en colaboración co Club BM Xallas, con clases todos os luns de 17.30 a 18.30, sen custe algún ata xaneiro.

Cando á ducia de actividades xestionadas directamente dende o Concello —fútbol sala, baile moderno, judo, balonmán, pilates, expresión corporal para menores e adultos, karate, tenis, tenis de mesa, patinaxe artística e xadrez en liña—, a oferta deportiva complétase con zumba, que conta cunha grande aceptación (unha vintena), que imparte en Lañas a

empresa El Juguetón, a través dun convenio de colaboración.

O Concello asinou outro convenio de colaboración para que o Club Baloncesto Brión poida adestrar no pavillón de San Vicenzo, o que permitirá promocionar este deporte na Baña. Ademáis, o vindeiro 1 de decembro terá lugar na Baña a proba comarcal de campo a través do programa Xogade,

e o 26 de marzo, o primeiro duatlón solidario, que será clasificatorio para o Campionato Galego. O Concello tamén fortaleceu a súa colaboración cos clubs locais. En canto á mellora de instalacións, o Concello debe ter rematadas antes de finais de ano as dúas pistas de pádel cubertas coas que vai transformar o pavillón de Lañas, cun custo de 48.000 euros.

Eventos deportivos como o recentemente celebrado Trail da Baña gañan aceptación entre os veciños.