La Voz de Galicia (Santiago) - El Comarcal Santiago
Homenaxe a Emilio Andújar, impulsor do ensino musical
[Emilio forján] Emotiva e merecida homenaxe a título póstumo que lle tributou A Baña ao que fora mestre e fundador da Banda Infantil da Baña, Emilio Andújar, durante a década dos anos oitenta. A sede da Escola Municipal de Música pasa a levar o seu nome coa descuberta dunha placa. Asistiron os seus familiares, concelleiros e antigos membros da banda e da escola na que deu clases.
Emilio Constantino Andújar Riveiro foi o verdadeiro precursor da educación musical no concello da Baña. Comezou a súa andaina como músico afeccionado xunto ao seu irmán nun trío tradicional de gaita, bombo e caixa, que se convertería deseguido no Sexteto Bañés, no que tocaría o bombo. O seu ingreso no servizo militar permitiulle unirse, polos seus coñecementos, á Banda de Música Militar de Infantería da Coruña, reforzando os seus coñecementos de solfexo, teoría, gaita e clarinete.
De volta do servizo militar, Emilio Andújar, que tocaba o saxo como ninguén, incorporouse ao Sindicato Nacional do Espectáculo e fundou en 1949 a orquestra Andújar, e no 1974 a Río Verde. Emilio Andújar, compaxinou ata a súa xubilación a súa paixón como músico e arranxista, tocando nas orquestras, co oficio de taxista.
No ano 1981, xa xubilado, chegaríalle a proposta dun grupo de pais e nais do colexio de San Vicente e o apoio do centro educativo para dar clases extraescolares de música. Non o dubidou e centrouse en ensinarlles o que máis amaba, a música. O seu labor ao longo deses anos foi vocacional e altruísta, e froito dese traballo crearíase a Banda Infantil da Baña, que debutaría na primavera de 1982 en Ordoeste; con ela chegou a espallar o nome do municipio por toda Galicia, España e o estranxeiro. A banda desenvolveu unha intensa actividade cultural ao longo de 25 anos, ata a súa desaparición no 2009.
Na década dos noventa, e froito da agrupación musical, créase a Escola de Música, coa incorporación do músico profesional Rafael Arosa que, xunto a Emilio Andújar e Mario Martínez, formarían o cadro docente e impartirían solfexo, teoría musical e instrumento ás rapazas e rapaces da Baña. Faleceu en febreiro de 2019, na aldea de Rial, parroquia de Ordoeste, aos 98 anos de idade.