La Voz de Galicia (Santiago) - El Comarcal Santiago
«Somos xente moi hospitalaria e témolo demostrado coa movida»
O rexedor xalleiro afirma que revisará «traballos» contratados con anterioridade para depurar responsabilidades sobre posibles prexuízos para o Concello
«Coñezo moi ben a comisión de festas e este ano o programa volve ser espectacular»
oi a súa primeira incursión na política e tapou moitas bocas. O empresario Alberto Romar Landeira é dende o pasado día 17 o novo alcalde de Santa Comba e o primeiro socialista que acada unha maioría absoluta. Está moi ilusionado con darlle un cambio ao seu concello natal, ese no que antes foi presidente da Asociación de Empresarios, cargo que deixou para liderar un PSOE medio roto trala moción de censura. —Que lle parecen as festas patronais?
—Coñezo moi ben á comisión de festas e creo que este ano o programa volve ser espectacular. Trátase dun grupo de xente moi traballadora a quen hai que recoñecerlle o enorme mérito de levar tantos anos sacando adiante unhas festas de primeiro nivel, porque seguimos sendo o municipio de maior poboación da nosa contorna e un punto de encontro para persoas dos concellos do arredor. A maiores, por parte do Concello é a primeira vez que se instalan aseos públicos no campo da feira, que falta facían.
—Que lle diría á xente para que veña a Santa Comba?
—Que son as mellores festas da volta. Que non o dubiden e que sempre serán ben recibidos. Somos xente moi hospitalaria e témolo demostrado en eventos, ou cando eran os tempos da movida. —Que tal os primeiros días na Alcaldía xalleira? —Os nosos primeiros esforzos están dirixidos á organización e planificación. Unhas das principais críticas era a improvisación existente no Concello de Santa Comba en case todas as áreas. Eu penso que a xestión política é parecida á vida empresarial, aínda con outras connotacións, de aí que había moito lugar á improvisación polo que ata finais de ano a clave vai ser a organización: primeiro, para diminuír o traballo dos empregados municipais; e segundo, para abaratar custos porque con unha boa planificación abarátanse moitos custos e acaba sendo máis produtivo o orzamento municipal. —E o contacto cos traballadores, como foi?
—Necesitamos mellorar o trato con eles. Sacarlles ese medo que tiñan polas presións que tiveron estes anos, que o comento sen acritude ningunha, e sobre todo contar con eles porque eu quedo alucinado que hai empregados que teñen unha serie de proxectos desde hai moitísimos anos que si que imos levar a cabo.
—Cre que haberá criterios obxectivos con Santa Comba? —Agardo que si, sen sectarismos. A maior parte de fondos que chegan aos concellos do rural veñen da Deputación e vimos certos «traballos» particulares que agora estanse vendo reflexados nas débedas que temos. Eu agardo ser alcalde máis de catro anos e veño aquí para tomar decisións, sobre todo xustas e tendo en conta a todo o mundo. Hai obras que están revisándose a día de hoxe e que se van depurar responsabilidades, sempre tendo tacto coas empresas, pois entendo que as empresas recibiron ordes da antiga corporación.
«Unhas das principais críticas que tiñamos era a improvisación no Concello»