La Voz de Galicia (Santiago) - El Comarcal Santiago
Sexto ano de esforzo dunha comisión de festas moi activa
«Realmente realizamos unha gran dedicación a nivel persoal, pero vale a pena ver o ben que responde a xente», afirman
Con diferenza, as de San Pedro están consideradas as mellores festas da zona e dá fe a gran cantidade de xente que arrastran os catro días programados pola comisión de festas que, por sexta vez, organiza un ambicioso programa con algunhas das mellores orquestras do panorama galego como son París de Noia ou El Combo Dominicano.
Este ano programaron un total de seis días que comezaron coa festa do Corpus, o pasado 11 de xuño, onde non faltou unha sesión vermú moi animada cos gaiteiros Os Campantes da Baña e o trío Banarama. E seguiron polo San Xoán, que xa é tamén tradición. Aparte dunha gran sardiñada no campo da feira, unha queimada e a cachela, non faltou a música coa disco móbil CDC.
Tamén encárganse de organizar as segundas festas en importancia do verán en Santa Comba: as de San Cristovo, a finais do mes de xullo. O sábado 29 pola noite haberá verbena, e o domingo 30 celebrarase a misa e, por segundo ano consecutivo, a concentración de coches clásicos, seguida da tradicional procesión motorizada de coches, autobuses e camións polas rúas de Santa Comba. Haberá premios para os mellor engalanados. O colofón á festa será unha tirada de fogos de artificio pola noite, logo dunha sesión vermú que se prolongará durante toda a tarde.
Os membros da comisión de festas asumen que lles gusta dinamizar o pobo: «Realmente realizamos un gran esforzo a nivel persoal, pero vale a pena ver o ben que responde a xente», sinalan desde a comisión, ao tempo que agradecen a sempre «importante receptividade da xente cando pasas a pedirlle a aportación para as festas. Sabemos que co encarecemento da vida non é fácil, pero é certo que recoñecen que cada ano hai moi boas festas e nunca defraudan».
Unha das novidades este ano serán os pasacalles que o día 30 de xuño, festividade de San Pedro, tamén se van achegar ata as aldeas máis próximas para darlle se cabe aínda máis o ambiente de festa a toda a veciñanza.
O caché das orquestras é tamén elevado cadrando co comezo dos dous meses fortes. «A París de Noia chega o primeiro sábado de xullo, con todo o que iso significa a nivel económico, pero o certo é que quixemos que fose un programa que atraia ao maior número de persoas posible como sucedeu o ano pasado coa Panorama, que había moito tempo que non se vía a tanta xente no pobo», comentan dende esta dinámica comisión composta por unha ducia de persoas e que realiza un traballo arduo durante meses para que a capital do Xallas teña a súa semana grande de festas.
Os doce membros da comisión de festas convidan a achegarse durante os catro días ata a capital do Xallas a gozar da que é a primeira das grandes citas festeiras na contorna das comarcas de Xallas e A Barcala, ao tempo que non faltará unha variada oferta de atraccións instaladas no recinto do campo da feira de Santa Comba, que sempre son un dos maiores reclamos para os festeiros máis novos.
«o día 29 os pasacalles chegarán por vez primeira ás aldeas máis próximas»
«Por San Cristovo, concentración de coches clásicos o 29 de xullo e tirada de fogos o 30»