La Voz de Galicia (Santiago) - El Comarcal Santiago
Debuxos, relatos, poesías e teatro para enxalzar o galego
O Concello busca fomentar e sensibilizar sobre a lingua
[S. G.] Fomentar e contribuír ao uso do galego, ese é o obxectivo do Concello de Val do Dubra de cara ao Maio das Letras, programación cultural na que unirán debuxos, relatos, poesías e teatro. Co ánimo de potenciar a participación veciñal, a primeira proposta é a de un ecléctico concurso polo Día das Letras Galegas, que ten como meta fomentar a sensibilización e coñecemento da lingua entre toda a veciñanza.
Desta maneira, haberá diversas categorías e modalidades. Para os cativos de tres a seis anos será un certame de debuxos no que poderán amosar como ven a lingua, a súa cor ou os principais lugares na que a utilizan. Tamén haberá dúas propostas máis, unha de relatos e outros de poesías, que deberán tratar sobre a importancia que cada participante lle concede ao feito de ter un idioma propio. Neste caso, haberá varias categorías segundo as idades. Dividiranse en nenos e nenas de 7 a 13 anos, de 14 a 17, e adultos de 18 en adiante.
Os participantes escolarizados en Val do Dubra poderán entregar os traballos directamente aos seus titores. Tamén terán a opción de formalizar a súa entrega no correo andrea.muino@valdodubra.gal, ou entregalo de forma presencial no Servizo de Normalización Lingüística do Concello, que se atopa no primeiro andar da casa consistorial. En calquera das formas, deberanse entregar dúas copias, tal e como se determina nas bases reguladoras, que poden consultarse na web www.valdodubra.gal. O prazo de presentación rematará o luns 13 de maio ás 15 horas e os premios son catro vales de 50 euros a gastar en libros en galego na libraría Ler de Bembibre.
Para completar esta iniciativa, o Concello aproveitará o día da entrega dos galardóns para realizar un maratón de lectura, no que se recitarán obras escritas en galego nas que se reivindicará a importancia da lingua. Os debuxos, relatos e poemas gañadores tamén serán expostos na biblioteca municipal e na páxina web do concello.
Para finalizar a programación polas letras galegas, o 28 de maio, o grupo Migallas ofrecerá un espectáculo ás 11 da mañá dirixido
ao alumnado de primaria dos dous colexios de Val do Dubra. Será na área recreativa, sempre que o tempo o permita, e que contará coa colaboración da Rede Cultural da Deputación da Coruña. Baixo o título, Que viva o galego!, amosarase un espectáculo de rúa, onde os asistentes veranse inmersos nunha aventura na que terán que superar varias probas relacionadas co galego, co obxectivo de conseguir una solución a un problema: a supervivencia da lingua. As probas combinan xogos físicos e intelectuais, así como baile, música e trabalinguas.