La Voz de Galicia (Santiago) - El Comarcal Santiago
Luísa Villalta será o epicentro da cultura na capital do Sar
Iventi Teatro e Fantoches Baj entran neste Mes das Letras
[S. G.] O Concello de Padrón súmase á conmemoración do Día das Letras Galegas, que este 2024 destaca á figura de Luísa Villalta, prolífica escritora, poetisa e violinista herculina. Para facelo por todo o alto, o executivo vén de organizar para o próximo mes unha intensa axenda de actividades, que se abrirá o venres 10 de maio, a partir das 20 horas, cunha presentación teatral a cargo de Inventi Teatro, que leva por título A libraría Máxica. A obra ofrecerase na emblemática e mítica praza de Macías, onde promete mergullar ao público nun mundo fantástico no que os libros cobran vida mentres o extraordinario carece de límites.
O sábado 18, ás 19 horas, a Coral Polifónica Padronesa organiza a 36 edición do Festival das Letras Galegas, coa participación da Coral A Lembranza, de Sada, así como da Coral Polifónica Máximo Gorki, de Vigo. O concerto ten como obxectivo achegar ao respectable diferentes obras do cancioneiro popular, creando un ambiente de harmonía e celebración da identidade cultural de Galicia.
De cara ao venres 24, ás 20 horas, os máis mozos de Padrón poderán gozar do traballo do grupo Títeres Brincadeira, que ofrecerán a peza Luísa Villalta e o violino de vento, obra que ofrece unha oportunidade única para coñecer máis sobre a vida e o legado da escritora homenaxeada, facéndoo ademais dunha maneira lúdica e accesible para todas as idades.
Para pechar as actividades culturais deste Mes das Letras, o venres 31 de maio, ás 20 horas, Fantoches Baj presenta Isaura e Tristán. Contastorias, unha interesante obra teatral para un público familiar creada a partir do último libro de Villalta, As chaves do tempo. Esta presentación, que tamén se levará ca bo na praza de Macías, é un tributo á rica herdanza cultural de Galicia, así como do papel fundamental que xogan os contos e as lendas na transmisión da identidade da terra. Co Mes das Letras, o goberno local quere facer partícipe a toda a veciñanza da importancia de apostar polo galego, así como de manter con vida una lingua propia que é unha parte fundamental da súa identidade.