Mascaretas a l’aire!

Nos creyebanos os reis d’o mundo hasta que en 2019 o covid-19, naixiu en as leixanas tierras de China se desanchó por totz os paises, sin parar cuenta de buegas ni de mars, sin saber con qué armas podebanos luitar contra ell pa mirar de que no nos acotolase, de que no nos furtase o millor que tenemos, a nuestra vida! En primeras nos diciban que se contachiaba por contacto y nos tenebanos que lavar as mans una ventena’i veces, dimpués que por os aerosols –por as alentadas, diciban atros– y pa mirar de librar-nos d’ell nos fizon portar as mascaretas. Quí nos iba a dicir que en o sieglo XXI ibanos a pasar mes de dos anyos con una mascareta –mascarilla, bozal– en a boca,

como os cans furos! Pareixeba que yeranos festellando as fiestas de carnaval, pero no yera denguna chanza, sino por una qüestión mes seria: por a nuestra salut y a de totz. Tenebanos que protecher-nos d’un maldau que andaba por astí con a intinción de fer-nos una mala chugada, como ‘o cocón’ que nos contaban en a infancia, pero aquell yera imachinario y iste ye de veras. En primeras las portaban nomás unos poquetz, pero a la fin se tornón en obligatorias por razons sanitarias. Y en podemos viyer de todas as farchas y colors por os lugars y as ciudatz. Quantas veces himos teniu que recular dende a carrera porque se nos ha ixublidau –olvidadoen casa! O millor ye deixar-la con as claus etrás d’a puerta, bien visteras. Beluns charran d’o lenguache d’as mascaretas, que retratan as ideas d’a persona que las porta, por os dibuixos y colors. Dimpués de muitos penars y gracias a os scientificos que inventón as vacunas, tamién por as mascaretas, podemos viyer a luz en o remate d’iste túnel y tornar l’asperanza pa las nuestras vidas! Y totz/todas soniamos ya con ichar as mascaretas a l’aire!

L’autor ye miembro de l’Estudio de Filología Aragonesa