Con a boca ubierta

Cada día sentimos, viyemos en os meyos audiovisuals u liyemos en os diarios unas ‘nuevas’que nos deixan con a boca ubierta y nos quedamos sin fuerzas pa tancar-la! Como a que veniba fa unos días en una revista: «Una empresa china inventa unos labios roboticos pa dar besos dende leixos, que se remenan y se templan». Son unos labios feitos de silicona y no solo se sobaten con as vibracions propias d’os besos, sino que amás tien unos sensors que los fan cambear de temperatura, como himos dito. Istos labios miran de substituyir a los besos reals. O creyador, Zhao Jianbo, afirma que, igual que os telefonos, os chats y os mensaches, o suyo robot aduya a la comunicación con atras personas. L’ha clamau ‘contacto perdiu’, porque a ideya ye que puedan continar besando-se os que quieran fer-lo a pesar d’estar aleixaus. Pa simular mes realidat a los besos, ixe aparato tien un emparador en o que se puede meter o telefono de traza que puedas guipar fito-fito a los uellos de l’atro en tanto que lo besas. L’invento ha prevocau muitas reaccions, pero a empresa que los fabrica, está muit goyosa. Cacaría?? que ya ha vendiu mes de tres mil labios besadors y que ha recibiu unos vente mil pedius. No ye mal quefer, pos cadagún cuesta trenta y cinco euros.

Os creyadors charran de que istos labios roboticos aduyan a aminuir a soledat y que tamién son una buena ferramienta pa emparar as relacions de parellas, amigos u familias que no pasan por un buen momento. Por agora iste robot da besos sin luenga y poco apasionaus, a pesar de que os labios se templan con os besos prolongaus. Por muit modernos y alantaus que nos sintamos, pasan cosas por istos mundos, que por soniadors que siamos, nos deixan con a boca ubierta. Cualsiquier día os ríos irán cara t’as montanyas!