O principio d’autoridat

En a sociedat podemos columbrar un par d’alacez basicos, que nos preparan pa’l futuro: a familia y a escuela. Tanto en la una como en l’atra ye menister parar cuenta d’unas normas que fagan posible ixa convivencia pa que dengún remate amolau de traza inchusta. Y en ixos ambitos, toz, fillos y pais, alumnos y mayestros, han sobrepasau os limites d’as normas que los enfilaban. «En tantos anyos de treballo –dice un mayestro- tiengo en a mía acordanza, cientos de conversacions con muitos pais d’alumnos pa uscar solucions a situacions conflictivas». Ixas discusions prencipiaban en a saber-las ocasions con frases evasivas: «Ye que iste ninón no fa caso a dengún! Ye que s’achunta con atros mocez que lo empuixan por malos camins!». Y hasta de manías persecutorias d’o profesorau contra o suyo fillo. Antonces les preguntábanos si en a suya casa teneban unas normas asumidas por pais y fillos pa avenir-se; si en a suya casa i hai un principio d’autoridat aclareixiu y aceptau… Y en muitas ocasions a vena d’o problema quedaba a l’aire. No habeba un principio d’autoridat razonada. U lo que yera pior, habeba dos autoridaz totalment chuxtapuestas, a d’o pai y a d’a mai. Y o mocet ixo lo captaba y le creyaba sentirs que no comprendeba y hasta lo enfoscaban. En Espanya, ista escuela gran en a que toz convivimos, i hai tamién unas normas que nos obligan. Agora, de grans, no viyemos claro si o principio d’autoridat lo exercen os chueces u as mayorías politicas que nos gubiernan. Como tapoco entendemos si os chueces cuan dictaminan sobre incumplimientos, lo fan conchugando as leis u seguntes as suyas ideas politicas. Y sería muit bueno pa la nuestra sociedat, aclareixer de buenas trazas istas dubdas que nos surten, pa que marchemos toz por a mesma endrecera.