La Voz de Galicia (Ferrol) - La Voz de Galicia (Ferrol) - Especial1
«O paso do mundo de papel a un en dixital é un feito»
MARÍA JOSÉ GARCÍA SEXTO Directora da Área de Modernización da Amtega
A dixitalización da Administración non é so mudar do papel a un entorno virtual. A transformación é máis profunda e vén propiciada polos cambios na lexislación. Uns trocos que modificaron tamén os procesos e funcións dos traballadores, e trouxeron maior seguridade e comodidade para a cidadanía.
Amodernización vai da man da dixitalización no século XXI. O seu achegamento, a súa plenitude, acádase por diferentes vías e formas. Non hai un só camiño. Pasar dun funcionamento analóxico a un dixital ten que ter en consideración varios factores: o desenvolvemento tecnolóxico e dos medios precisos para elo, pero, sobre todo, facer unha revisión dos procesos de traballo. «Non se trata de facer o mesmo que no papel pero nun entorno dixital. Temos que ir ordeando as nosas actividades e os nosos procedementos ao eido dixital», sinala María José García Sexto, directora da Área de Modernización das Administracións Públicas de Amtega.
«Debemos cambiar non só as formas, senón todos os procedementos de relación co cidadán. Os traballadores deben formarse para aproveitar as novas ferramentas. A Administración debe facer que a cidadanía avance nese campo, facelo dunha maneira fácil», resume a directora sobre o feito nos últimos anos. Non é un traballo sinxelo. Falamos dunha evolución día a día, marcada por dous fitos de relevancia: por un lado a lei 11/2007 que estableceu o marco inicial do desenvolvemento da administración electrónica (co que se leva traballando dende 2010); por outro lado, na actualidade, entrou xa en vigor a lei 39/2016 que impón un calendario e marca novos retos. «Son moitas novas ferramentas e moitos procedementos, polo que temos que ir adaptándonos continuamente. Neste segundo plan no que nos atopamos estamos nun período cunha actividade importantísima coa activación de moitos sistemas». Sexto fai fincapé nun dato dado por verdadeiro moitas veces: «A administración electrónica non é por unha aplicación informática e xa está. É algo que afecta, transversalmente, a todo o ente público». O paso dun mundo de papel a un de códigos binarios é un feito, e os seus aspectos positivos viran cara a cidadanía: máis comodidade, máis pro actividade e maior axilidade nos trámites.