La Voz de Galicia (Ferrol) - La Voz de Galicia (Ferrol) - Especial1
A Mariña consolídase como destino turístico sostible co apoio da Deputación de Lugo
A institución provincial mantén un forte compromiso coa comarca, que se traduce en diferentes políticas de promoción do territorio a través do turismo, de apoio á mobilidade e de fomento do emprego e do benestar social
A comarca da Mariña estase consolidando como un destino turístico de calidade e sostible. Un lugar ao que achegarse en calquera época do ano para desfrutar de experiencias únicas que aportan valor ao visitante e que deixan riqueza no territorio. Unha aposta que responde ao modelo de turismo que impulsa a Deputación de Lugo na provincia e que no caso da mancomunidade da Mariña se traduce nunha achega económica de 81.000€ para que os concellos desta comarca poidan sacar adiante o Plan de Sustentabilidade Turística que lles concedeu o Goberno de España.
Comarca de inmensos recursos patrimoniais e naturais con proxección nacional e internacional, como a praia ribadense das Catedrais, o casco histórico de Viveiro, ou a Catedral de Mondoñedo, tamén conta con espazos e monumentos igualmente espectaculares como a cascada da Xestosa en Ourol, o Pazo de Tovar en Lourenzá ou o Castelo da Frouxeira en Alfoz.
Fomentar este tipo de turismo forma parte da colaboración transversal e continua que mantén a Deputación de Lugo coa comarca mariñá. Unha forma de traballar que redunda no beneficio e benestar dos veciños e veciñas dos concellos da Mariña: Alfoz, Barreiros, Burela, Cervo, Foz, Lourenzá, Mondoñedo, Ourol, A Pontenova, Ribadeo, Riotorto, Trabada, O Valadouro, O Vicedo, Viveiro e Xove.
23M€ en mobilidade
De feito, desde o inicio deste mandato, a institución provincial leva investidos preto de 23M€ só en infraestruturas viarias desta comarca a través de diferentes liñas de actuación. Unha cantidade importante que responde ao compromiso do presidente da
Deputación, José Tomé Roca, coa mobilidade e co equilibrio territorial. Dos 4.200 quilómetros da rede de estradas provinciais -a máis longa de toda España e tres veces maior ca da Xunta en Lugo- preto de 800 percorren a comarca mariñá.
Fomentar o emprego, impulsar o tecido produtivo e asociativo, mellorar e manter os servizos públicos e atender as necesidades dos seus veciños e veciñas son outras das actuación posibles na Mariña grazas aos máis de 5M€ que a Deputación de Lugo inviste na comarca a través do Plan Único de Cooperación cos Concellos desde ano 2022.
A Deputación de Lugo impulsa tamén outras citas e actuacións de importancia para a comarca a través de diferentes convenios, fundamentais para fortalecer o tecido produtivo e asociativo deste territorio. Así, a institución provincial mantén achegas para colectivos como a Federación de Confrarías de Pescadores; citas musicais como o Resurrection Fest ou o Bal y Gay; ou para a mellora de infraestruturas básicas. Recentemente a institución provincial comprometeu medio millón de euros para mellorar a accesibilidade do centro urbano de Foz, 45.000€ para acondicionar o exterior do Centro Ocupacional
do Concello de Vivero e 65.000€ para permitir ao Concello do Valadouro mercar o antigo cine e un edificio en Ferreira.
Este plan do Goberno do Estado, dotado en total con 2,3M€, pretende sacar o máximo rendemento á potencialidade turística da comarca e impulsar o seu desenvolvemento económico
Centros de atención a maiores
Ademais, a Deputación ten en funcionamento na Mariña os centros públicos de atención a maiores de Trabada e de Ribadeo, que atenden a preto de 80 persoas e crean medio cento de postos de traballo directos, ademais da riqueza e do emprego indirecto que xeran na zona. Así mesmo, a institución traballa para crear outras dúas residencias na comarca, nos concellos da Pontenova e de Ourol.