La Voz de Galicia (Ferrol) - Especial2
«Os veciños sentímonos moi orgullosos de ser de Narón»
Marián Ferreiro Alcaldesa de Narón Afronta a fin do mandato cunha auténtica cascada de proxectos en marcha por todo o municipio e ultimando novas actuacións
Aprimeira alcaldesa de Narón, Marián Ferreiro (San Xiao, 1977) celebra o festivo local facendo balance e coa vista posta nos próximos comicios.
— Neste 23 de novembro, ¿de que diría que se senten orgullosos os naroneses?
—Creo os naroneses como as naronesas e eu como veciña e alcaldesa nos sentimos en xeral especialmente orgullosos desta cidade. Dunha cidade que presta servizos de calidade, que dispón dunha ampla oferta de zonas verdes e de xogo na zona urbana e rural, con tres escolas infantís municipais e unha concertada, con escolas culturais e deportivas ás que acoden tamén persoas doutros concellos e cunha oferta cultural en programación e en instalacións deportivas que nos converteu hai tempo nun referente, ao igual que na de educación viaria.
— Parece que Narón xa non ten o ritmo de crecemento de antano. ¿A que se debe?
— Seguimos avanzando pero doutro xeito. Temos unha aposta firme por facer investimentos, tal e como se reflicte nos orzamentos. Un dos síntomas de que o ritmo é cada ano mellor é que o orzamento de 2018 é o máis elevado da historia da cidade e o de 2019 será aínda superior. Destinar case once millóns de euros para investimentos este ano considero que é ba- se suficiente para constatar que esta cidade continúa medrando, que é o que queremos.
— Os reproches entre Ferrol e Narón son frecuentes, pero vostede e o seu homólogo venden unha relación idílica. ¿Como son, en verdade, as relacións coa cidade veciña?
—As relacións con Ferrol son boas. É certo que nalgún momento podemos discrepar en determinadas cuestións pero é simplemente porque avanzamos a ritmos diferentes.
— ¿Tempos irreconciliables?
—Si, hai tempos diferentes por- que tamén é certo que en Narón temos unha estabilidade no goberno que nos permite unha axilidade maior á hora de afrontar o traballo diario.
— Coa fin do mandato disparáronse as obras, que hai quen cualifica de electoralistas.
—Estivéronse facendo obras durante toda a lexislatura —saneamento, abastecemento, eficiencia enerxética, melloras viarias, zonas verdes…—. Os cambios na Lei de Contratos concentraron máis a execución das obras neste final de mandato.
— Multiplicáronse tamén as protestas por proxectos como a senda do Val, a estrada de Sedes ou a de San Xiao.
—Hai que aclarar que se trata nos tres casos de obras proxectadas e financiadas pola Xunta e pola Deputación, que son as que realizan os proxectos, contratan os traballos, fináncianos e, no caso de consideralo, teñen total potestade para realizar as modificacións oportunas.