«Deixamos a débeda a cero e aumentamos o investimento»

A rexedora mira ao futuro e apunta liñas de traballo.

— Dígame tres obxectivos pendentes que considere fundamentais.

—Un deles é encher o polígono Río do Pozo de empresas, completar esas parcelas que aínda están á venda para continuar xerando emprego na cidade. Tamén é moi importante seguir ampliando a rede de saneamento e abastecemento, dotando deses servizos ás zonas de peor acceso e que requiren un maior investimento e tamén continuar avanzando no proxecto de humanización da nosa cidade con políticas de mobilidade e desenvolvemento sostible. En definitiva, continuar mellorando a calidade de vida dos naroneses.

— ¿Cal é a mellor herdanza deste mandato?

—Deixar a cero a débeda ao tempo que incrementamos os investimentos na cidade. Unha herdanza que, afortunadamente, non é xa un reto senón unha realidade no noso concello grazas á boa xestión realizada.

— Un prognóstico, ¿Seguirá sendo Marián Ferreiro a alcaldesa dos naroneses o 23 de novembro do 2019?

— Iso van decidilo as naronesas e os naroneses en maio co seu voto. Nós seguiremos traballando para merecer a súa confianza.

— ¿Como celebra esta xornada especial a alcaldesa?

—Desfrutando xunto co resto de veciñas e veciños de Narón desa ampla programación deseñada para conmemorar como se merece o 23 de novembro, Día de Narón.