Unha aposta pola marca Galicia Calidade

Potenciar os produtos galegos de calidade é unha das liñas de traballo da actual Consellería do Medio Rural. Consideran que estes son a mellor forma de garantir o futuro do medio rural e de loitar contra os problemas que presenta, como o despoboamento ou os incendios forestais. Por iso, ademais dos indicativos de calidade de cada unha das denominacións de orixe ou indicacións xeográficas protexidas, existe a marca Galicia Calidade, que quere ser tamén un paraugas baixo o que amparar aos produtos do agro galego. Na intención da consellería para os próximos exercicios está potenciar e reforzar esa marca coma un selo que englobe, identifique e mellore o posicionamento do sector primario nos mercados. Este reforzo virá da man do coñecido coma Plan de Reactivación e Dinamización impulsado por Medio Rural, que suporá unha inversión de case medio millón de euros dos 165 millóns que se investirán en total nese programa.